FRETILIN: Tenki fó atendimentu espesial ba Soekarno

Deputada bankada Frente Revolucionária de Timor-Leste Independente (FRETILIN), Maria Angelica Rangel, sujere ba Ministériu Finansa (MF), atu halo tratamentu espesial ba pasiente veteranu Soekarno, ne’ebé halo hela tratamentu saúde iha Bali-Indonesia.

“Ha’u husu ba Ministériu Finansa (MF) atu haree fila-fali moras sira ne’ebé maka iha estranjeiru, tanba ita aprova OJE foin dau-dauk ne’e atu selu tusan sira ne’e, husu MF atu tau matan espesial ba ita-nia veteranu ida naran Sukarno ne’ebé maka agora iha hela Bali, hodi halo tratamentu fasi ran. Sé ita selu ita-nia pasiente ba iha Bali, tenki iha relatóriu ida loos, katak pasiente X hetan moras no atendimentu espesial, pasiente X tenki hetan atendimentu hanesan ne’e iha uma, depois maka ba fasi ran no hetan atendimentu semana ida dala 2 iha hospital”,deputada bankada FRETILIN liu husi ninia deklarasaun polítika iha plenaria, Parlamentu Nasional (PN), Segunda (01-10-2018).

Nia tristi tebes, tanba depois hetan atakasaun iha loron 5 Setembru halo nia koalia mós la hatene ona no la hetan atendimentu espesial ka hela iha hospital, hanesan ema veteranu ida, tanba depois check up katak ninia uat iha ninia ulun maka kotu, dotor haruka nia fila ba uma.

“Ho nune’e halo ninia subriñu sira maka fadigadu loron kalan, tanba fó de’it ai-moruk penenang (Hakmatek) maka nia hemu, sé ai-moruk penenang la fó ba nia, signifika nia emosaun, loro-loron nia hakilar tun sa’e hela de’it, tanba senti moras iha ulun”,haktuir Maria Angelica Rangel.

Nia subliña, Suokarno ne’e ema luta nain ida, tanba ne’e Governu liu-liu MF tenki halo atendimentu espesial ba nia, tanba agora nia iha uma de’it, labele hetan atendimentu husi médiku sira.

Hatan ba preokupasaun ne’e, Ministru Reforma Lejislativa no Asuntu Parlamentar (MRLAP), Fidelis Magalhães, hateten, agora Governu rejista ona preokupasaun veteranu Soekarno ninian, tanba sei hato’o ba Ministériu Saúde (MS), hodi buka solusaun.ves