Solusiona problema ambiental, PR Lú Olo apela ba jeóloju sira servisu maka’as

Prezidenti Repúblika (PR), Francisco Guterres ‘Lú Olo’, fo apelu  ba Jeóloju sira katak, Jeóloju atu investe maka’as liu tan iha sosializasaun kona-ba jeolojia no kontinua servisu iha terenu ba oin, tamba kna’ar Jeóloju sira nian importante ba sosiedade Timor-Leste, ne’ebé la iha koñesimentu  natoon atu buka solusaun ba problema  ambiental sira ne’ebé mak mosu.

“Populasaun ida ne’ebé matenek kona-ba rekursu natural sira, la’os de’it iha nivel lokal, maibe mos iha nasional, iha kondisaun atu ho konsiensia no motivasaun, hadia relasaun entre ita ema no ambiente ka pasu fíziku  iha ne’ebé ita hela ba, populasaun ida ne’ebé mos iha potensial atu uza, jere  no explora rekursu natural sira, ba sira nia benefisiu rasik no komunidade sira nian, ho sustentavel, nune’e kontribui ba rejenerasaun  fauna (balada) no Flora (Ai-horis )  nian”,hatete PR Lú Olo, hafoin hala’o abertura ba Kuarta Konferensia Internasional Geosiensia iha Timor-Leste, ne’ebé realiza husi Institutu Petroleu no Jeolojia, iha Centro Convenções de Dili (CCD), Tersa (23/10/18).

PR Lú Olo akresenta, koñesimentu no lalaok  protesaun no dezenvolvimentu ba rekursu jeolojiku no  natural,  sai hanesan   komponente ida husi ezersisiu sidadania no soberania Timor-oan, no hametin sentidu  katak, rekursu sira ne’e publiku, partense ba ema hotu no sai nu’udar elementu husi prosesu identifikasaun ho buat hirak ne’ebé haleu ema.

“Fo lisensa mai ha’u atu hato’o  fraze balun ne’ebé mak ha’u hetan, Nasaun ida ne’ebé la rekoñese  ninia rekursu  minerais se nunka  bele sai nasaun ida ne’ebé kompletamente  seberanu,  koñesimentu jeolójiku  hanesan  fator soberania  ida,  ema ne’ebé koñese di’ak ninia teritoriu ida kapasidade  atu demarka no defende  teritoriu hasoru sira ne’ebé  kaan teritoriu  ne’e”,afirma Xefi Estadu ne’e.

Hatutan PR Lú Olo, koñesimentu kona-ba meiu fíziku  nasional hanesan   fator  fundamental  ida husi defini polítika hirak konaba  oinsa mak bele uza  no okupa teritoriu, alende ne’e, koñesimentu ne’e importante tebes ba fornesimentu bee mos ba munisípiu sira ne’ebé seidauk iha bee,  ba konservasaun no prezervasaun ambiente nian, no mos ba previzaun  kona-ba dezastre  natural, ida ne’ebé hotu fo impaktu ba populasaun  Timor-oan nia kualidade vida.

“Sosiedade moderna sira hatan ba dezafiu  liu husi koñesimentu  tekniku  no sientífiku ne’ebé hetan, tamba ne’e mak ha’u apela ba  ita nia Jeóloju sira atu investe maka’as liu tan  iha sosializasaun  kona-ba jeolojia  no kontinua servisu  iha terenu ba oin, tamba imi nia kna’ar ne’ebé importante duni ba sosiedade ida hanesan  ita nian,  ne’ebé la iha koñesimentu natoon atu buka solusaun ba problema ambiental sira ne’ebé mak mosu,  imi bele konta ho Prezidenti Repúblika nia apoiu”, realsa PR Lu Olo.Oly