Kuaze tinan nen ona narativa la mai, Timor-oan protesta Embaixada Portugal

Timor-oan sira ne’ebé trata dokumentu hodi ba buka servisu iha Inglaterra no Irlanda, protesta Embaixada Portugal (EP) iha Timor- Leste (TL) ne’ebé prosesa dokumentu tarde, tanba kuaje tinan nen (6) ona sira la simu narativa.

 Alende  protesta  Embaixada Portugal, kandidatu sira ne’e mos ezijie ba   Parlamentu Nasional no Governu atu urjentimente  konfirma emabaixada Portugal  kona ba prosesu dokumentu traballador sira nian ne’ebé konsidera  kleur liu .

Portavoz kandidatu traballador  ba Inglateraa nomos Irlanda, José  Ricardo, hateten,  reprezentante  povu iha uma fukun Parlamentu Nasional nomos  VIII Governu Konstitusional ne’ebé lidera husi Primeiru Ministru, Taur Matan Ruak, atu  labele nonok  deit ho preokupasaun sira ne’e, maibe tenki buka meius oinsa konfirma embaixada Portugal tanba saida mak sira nia dokumentu  liu-liu narativa  ne’ebé mak sira selu hotu ona  kada ema ida  US$ 300, maibe to’o agora  la mosu, aat liutan laiha informasaun ruma husi EP.

“Husu ba Embaixada Portugal iha Timor-Leste, liu-liu diplomata  Portugal iha Timor Leste, atu  esplika klaru tanba saida mak sira nia dokumentu liu-liu narativa ne’ebé mak sira  selu hotu ona to’o agora la mosu. Ami mos husu ba embaixador Portugal iha Timor-Leste atu prosesa lalais ami nia dokumentu, tanba ami lakohi sai atan bebeik ba situasaun ida ne’e, no embaixada Portugal la’os fatin atu halo fallansu ba ami nia dokumentu atu sai sidadania Portuguesa”,José  Ricardo, hateten  liu husi  no konferensia imprensa iha  resintu Embaixada Portugal, Colmera -Díli, Tersa (20/11/2018).

José  Ricardo hateten,  tinan 5  la’os tempu ne’ebé  badak, maibe naruk tebes ona, tanba ne’e nu’udar reprezentante povu nian iha  uma fukun Parlamentu Nasional tenki tun hodi  konfirma  lalais  tanba sa prosesu  dokumentu liu-liu narativa ne’ebé selu karun tebes husi kandidatu sira,  maibe hein kleur tebes, la sai.

“Husu ba nai ulun sira  ne’ebé ami povu aileba sira hili ona ba tur iha uma fukun Parlamentu Nasional  atu rona no haree ami nia problema  ne’ebé ami enfrenta kuaje tinan 5 ona kona ba ami nia dokumentu sira iha EP ne’ebé kleur los ona maibe la mosu”,dehan nia.

Hatan ba preokupasaun ne’e GMN tenta konfirma ho Embaixador Portugal  iha Timor Leste, José  Pedro Machado, maibe nia lakohi fo resposta.

Nune’e mos reprezentante povu iha Parlamentu Nasional husi Komisaun B  trata asuntu  Swguransa no Relasaun Externa, ne’ebé  kandidatu sira hato’o ona karta pestisaun kuaje semana rua ona, maibe laiha resposta nune’e GMN tenta konfirma iha komisaun B nia fatin maibe laiha resposta.

Antes ne’e, iha fulan Setembru, tinan ne’e mos kandidatu traballador Inglaterra no Irlanda sira halo ona asaun protesta  hodi husu esplikasaun  kona-ba prosesu  trata dokumentu ne’ebé mak tarde liu, maibe embaixador Portugal ba Timor-Leste,  José  Pedro Machado, rejeita la fo informasaun.Ola