Xanana konvida juventude kuda paz iha fuan

Líder nasionál, Kay Rala Xanana Gusmão, hateten, ema hotu liu-liu juventude Timor-oan atu banati tuir ezemplu Sry Chinmoy hodi kuda paz iha ida-idak nia fuan.

Líder Nasionál Kay Rala Xanana Gusmão ko’alia lia hirak ne’e hafoin partisipa halai dame nian iha Dili, Kinta (07/02/19).

Eventu Peace Runi (Halai dame) hanesan kampaña internasionál kona-ba paz perante mundu ne’ebé nakonu ho funu no violénsia.

Espiritu Sry Chinmoy lori delegasaun husi nasaun ualu marka prezensa iha korida ba paz ne’ebé hala’o iha Díli tanba hakarak mos atu Timor-Leste moris iha paz.

Tanba ne’e Xanana Gusmão konvida ema hotu liu-liu joventude timor-oan atu banati tuir ezemplu Sry Chinmoy hodi kuda paz iha ida-idak nia fuan.

“Sry Chinmoy ema ida que iha nia laran, hanoin, hakerek no aktividade no husu ba mundu tomak atu kaer metin hanoin konabá dame. Tanba ita hotu hatene, laiha dame sei laiha buat ida, sei laiha dezenvolvimentu no sei susar tebes, hanesan iha rai barak iha kontunente àfrika ne’ebá,” hateten líder Nasional, Kay Rala Xanana Gusmão.

Alem de delegasaun husi nasaun ualu ne’ebé marka prezesna korida da paz ne’e mos hetan partisipazaun másimu husi Prezidente Parlamentu Nasionál, espoza Prezidente Repúblika, Polísia Nasionál Timor-Leste, funsionáriu públiku  inklui estudante sira iha kapital.

Rute Peace Run tinan ne’e hahú iha Parlamentu Nasionál ba Palásiu Prezidensial Bairu Pite tun ba Farol to’o iha Palásiu Governu no remata iha Jinaziu Díli. Programa Peace Run sempre realiza dala ida kada tinan rua.Ito