ANC husu TT, Telemor-Telkomcel dezliga númeru ne’ebé la rejista

Autoridade Nacional de Comunicações (ANC) husu ba operador Timor Telecom (TT), Telemor no Telkomcel atu dezliga númeru kartaun pre-pagu ne’ebé seidauk halo rejistrasaun, nune’e bele kontrola diak liu tan liña telekomnikasaun iha Timor-Leste (TL).

“Ha’u ANC husu deskulpa mós ba konsumidores sira ne’ebé mak hetan desligasaun katak sira labele uza sira nia númeru telemovel hanesan bain-bain mesmu sei iha pulsa iha númeru refere, tanba hetan ona desligasaun. Maske prosesu rejistrasaun telemovel pre-pago remata ona iha loron 31 de marsu tinan 2019, nune’e tuir regulamentu operadores sira tenke desliga númeru sira ne’ebe mak larejistradu to’o iha loron ikus”, afirma Prezidente ANC, João Olívio Freitas, ba jornalista sira liu husi konferensia imprensa iha edifisiu ANC Kaikoli, Díli Kuarta (17/04/2019).

Tuir regulamentu, númeru sira ne’ebé lajistradu to’o iha loron ikus, labele uza ona ba samada ka haruka SMS ka asesu internet. Ba konkluzaun faze dahuluk ba implementasaun governu ida ne’e, ANC hato’o agradese.

Desligasaun akontese tamba iha posibilidade rua, primeiru númeru telemovel ne’e la rejistradu to’o iha loron ikus iha loron 31 fulan marsu tinan 2019. Ba kliente ne’ebé mak afetadu ho desligasaun ANC husu atu sira hakbesik an ba loja  ka ajente operadores sira nian atu bele husu atendimentu prosesu depois de loron ikus rejistrasaun nian.

“Karik sei iha pulsa iha kartaun sim ne’ebé mak hetan desligasaun bele konsulta ho operadores sira ba obsaun ka solusaun ruma ne’ebé desponivel ba kliente ne’e. Nune’e mós ho kliente sira karik hetan desligasaun ba kartaun sim ho númeru santik, kliente ne’e bele konsulta ho operadores sira atu husu konaba obsaun bele ka lae? Atu kria konta foun ho númeru santik ne’ebé mak hetan tiha ona desligasaun”,

ANC mós apela ba públiku katak, iha fulan hirak tuir mai  ANC sei implementa fase daruak, husi programa rejistrasaun kartaun sim pre-pago nian. Iha ne’ebé sei hala’o verifikasaun ba identidade sira ne’ebé rejistradu ona  ba númeru telemovel pre-pago nian ho objetivu atu estabeliza sistema rejistu sentral ida ne’ebé mak atualizadu. Aes