Autoridade lokal Bidau Santana ezije Telemor sobu torre

Autoridade Lokal no komunidade Bidau Santana, husu ba kompañia Telemor atu hapara kontratu arendamentu ho pesoal Polisia Nasionál Timor-Leste (PNTL), Carlito Álvaro ho eis Xefi Aldeia Manumata, Fernando Mesquita kona ba atu harii antena Telemor iha Raikota Kotalikisa, no ezije mós ba Telemor atu sobu urjenti tore ne’ebé hari’i ona iha Suku refere.

Ezijensia Xefe Suku no komunidade Bidau Santana sira nian ne’e, hato’o ba liu husi konferensia ba imprensa iha Sede Suku Bidau Santana Díli, Sesta (12/04).

“Ami husu ba kompañia Telemor atu hapara kontratu arendementu ba pesoal PNTL Carlito Alvaro no eis Xefe Aldeia Manumata, hodi  fulan-fulan hetan osan, ami  Autoridade Lokál, hamutuk ho komunidade Bidau Santana, ezije ba kompañia telekomunikasaun  telemor atu hapara kedas ona kontratu arendamentu ba sira na’in rua, tanba rai ne’ebé hari’i tore antena telemor ne’e, la’os sira na’in rua nian, maibé patrimóniu kultural komunidade Bidau Santana nian”,  hateten Xefe Suku Bidau Santana, João Paulo de Andrade.

Nia haktuir, tore ne’e hari’i iha tinan 2013, no to’o ohin loron kada fulan kompañia kontinua halo arendamentu ba Carlito Alvaro ho Fernando Mesquita.

“Antes ne’e ami bolu ona kompañia telemor ho Carlito atu halo mediasaun atu buka solusauan, maibé sira na’in rua lakohi koopera ho lider komunitáriu. Tanba ne’e ami ezije ba telemor atu sobu fila fali tore ne’ebé harii ona iha  Rai Kota Likisa”,  relata Fernando.

Iha fatin hanesan, eis-Xefe Suku Bidau Santana, Francisco de Assis Freitas, hateten, bainhira kompañia telemor hari’i tore iha Kota Likisa,  laiha kuñesimentu husi Autoridade Lokal, ne’eduni husu ba kompañia telemor atu sobu tiha tore ne’e”, afirma Vrancisco.

Nia haktuir,  bainhira kompatelemor la sobu tore ne’e, Autoridade Lokal ho komunidade sira sei hato’o keixa ba Terras Propriedade atu tu’un direita hodi rezolve.

Entretantu, to’o notísia ne’e fó sai, jornalista GMN seidauk hetan konfirmasaun husi parte kompañia, inklui  Carlito no Fernando.aba