DPC realiza espozisaun fotografia apoia veterana Kasian

Díli Photography Community realiza espozisaun ba produtu fotográfia hamutuk 34, ho objetivu atu fó apoiu ba eskola Infantil iha Munisípiu Liquiça,   ne’ebé hari’i husi veterana Madalena Bidau Soares ho kódigu “Kasian”.

Koordenador Díli Photography Community (DPC) Alibaba Timor hatete, espozisaun fotográfia ne’e, sira hala’o volutáriamente hodi suporta eskola ne’ebé harii husi veteran Kasian.

“Objetivu husi espozisaun ida ne’e, halai liu ba fotográfia, no karidade, oinsa atu ajuda mãe Kasian, hodi suporta fali nia eskola infantil, ne’ebé nia hari’i iha Liquiça, fotográfia hamutuk 34 mak atu fa’an fila fali, atu suporta fali veterana Kasian, tanba mãe veterana Kasian, hanesan mós  inan  voluntáriu ida, ne’ebé mak hari’i eskola ne’e, no mós suporta labarik ki’ik oan sira, oinsa  atu bele hetan edukasaun di’ak iha futuru”, informa Koordenador DPC ne’e ba Jornlaista sira, Segunda (15/04/2019) iha Embaixada Portugal Díli.

Nia haktuir, atividade iha DPC  ne’e, sira servisu ho voluntáriu,  hodi bele realiza espozisaun refere, no espozisaun ne’e rasik ho preparasaun kuaze tinan ida resin, atu prepara fotográfia, tanba sira tenki prepara tema ba fotografia sira ne’e, hodi nune’e bele, sekuensia fotográfia  ne’e iha nia istória.

“Ami fa’an fotográfia ne’e, kada foto ida ami fa’an USD200, maibé sekuandu iha lelaun, entaun ami fa’an ba USD600, husi kada fotográfia 34 ne’e ho folin ne’ebé hanesan de’it maka USD200, ami nia tarjetu bazea ba fotográfia, se  sosa fotográfia hotu, ida ne’e  mak ami entrega ba mãe Kasian”, relata Alibaba.

Alende ne’e, veterana Madalena Bidau Soares ka “Kasian” no partisipante sira iha espozisaun ne’e, hato’o agradesimentu bo’ot ba DPC , tanba ho inisiativa ne’ebé   di’ak, hodi hanoin fó apoiu ba veterana Kasian, liu-liu ba eskola ne’ebé nia hari’i  iha Infantil.

“Sai veteranu atu bele servi fila fali ba komunidade, no ba feto maluk no mane maluk sira ne’ebé mak lahatene saida mak lei funu nian, konta fali istória ba sira, atu aban bain sira-nia oan sira hetan edukasaun di’ak iha futuru, tenki hatene mós istória Timor nian, maibé kuandu ha’u sei moris, imi presiza ha’u prontu atu  ita tulun malu, atu nune’e ita-nia nasaun sai naran di’ak, hetan dignidade di’ak, iha  nasaun seluk nia matan”,  realsa Kasian.

Nune’e mós tuir reprezentante Governu, Vise Ministru Administrasaun Estatal, Abilio Jose  Caetano, husu ba publiku atu se mak iha interese hodi fó apoiu ba veterana Kasian nia eskola, bele ba iha Embaixada Portugal, atu haree fotográfia iha espozisaun ne’e.

“Espozisaun ne’e realiza husi DPC, hanesan esforsu ida ké kapas tebes, iha inisitiva husi ita-nia joven sira fotografu sira, ne’ebé ha’u haree barak tebes, tanba sira tama iha komunidade fotográfika Díli, inisitiva kapas tebes, hanorin ita atu ita bele halo esforsu, hodi buka servisu, no oinsa atu fó kontribuisaun ba ema  sira ne’ebé presiza tulun”, subliña Abilio.oly