PM Taur uza kareta privadu ba hala’o servisu governu

Primeiru Ministru (PM), Taur Matan Ruak, sa’e kareta privadu hodi hala’o servisu VIII Governu Konstitusionál nian.

Tuir observsaun JNDiário, iha Tersa (16/04), Xefe Governu ne’e sa’e kareta privadu ba halo enkontru semanál ho Prezidente Republika iha Palasio Prezidente, Bairo Pite, Díli.

Primeiru Ministru Taur Matan Ruak sei kompleta tinan ida lidera Oitavu Governu Konstitusionál, maibé, iha kestaun balun ne’ebé diferente husi Primeiru Ministru Taur Matan Ruak  ho Primeiru Ministru sira seluk ne’ebé antes ne’e.

Relasiona ho kestaun ne’e, Primeiru Ministru Taur Matan Ruak hateten, laiha lei ida mak bandu atu uza kareta privadu ba halo servisu.

“Lei ida ne’ebé mak hatete ha’u labele uza ha’u-nia kareta, imi nar-naran de’it, dalaruma aban-bainrua ha’u hakarak la’o de’it mós di’ak la problema,” dehan Primeiru Ministru Taur Matan Ruak ba Jornalista sira hafoin ekontru seminal ho Xefe Estadu.

Kareta privadu nebe Primeiru Ministru, Taur Matan Ruak uza nee xapa matrikula 10.003.

Enkuantu, Primeiru Ministru Taur Matan Ruak simu tomada de posse iha loron (22/07/ 2018) husi Prezidente Repúblika Francisco Guterres Lú Olo, iha Palásiu Nobre Lahane Osidental.Eus