AMD distribui sasán Xineza ba orfanatu Santa Clara

Autoridade Munisípiu Díli, liu husi Jestaun Merkadu Guarda Munisípiu Díli, halo distribuisaun ba sasan Xineza sira-nian ne’ebé pessoal guarda sira prende iha Díli laran, ba  orfanatu sira iha Santa Clara FCJM sira.

“Ami primeiru hahú hala’o patrullamentu iha tinan 2018, ami bazea ba lei de’it, dekretu lei númeru 33/2008 ne’ebé hatete, sasan ne’ebé mak abandona la tau iha fatin adekuadu,  jestaun merkadu guarda Munisípiu Díli,  sei sita no sei oho, liu-liu la’o iha dalan públiku ka hala’o negósiu iha dalan  públiku, iha ne’ebé fatin sira ne’e Estadu bandu, no ba Xineza sira ne’ebé  la fa’an tuir regras, ami sempre avizu, fó karta ba sira katak, labele fa’an sai liu  ba estrada ka iha trotoar leten”, informa Kordenador  Jestaun Merkadu Guarda Munisípiu Díli, Joaquim Alves Belo, ba jornalista sira iha Ailoklaran Díli,  Kinta (04/07/2019).

Joaquin haktuir, sira prende sasan Xineza sira nian ne’e iha loron 2 fulan Jullu ne’e, Xineza sira kontra lei, no sasan sira ne’e  distribui  ba ema sira ne’ebé presiza, hanesan orfanatu Santa Clara Ailok Laran, hetan mós apoiu husi PNTL no segurnsa DNSP sira.

“Sasan  sira ne’e  ami prende iha Bidau Akadiru Hun, Audian, fatuhada, Bairo  Pite, no seluk tan, kontinuasaun ami sei la tolera ba sidadaun Timor-oan  se de’it, inklui estranjeiru sira, ezemplu hanesan iha  Kampung Baru, rotunda Akau  Audian no Largo Lecidere no fatin  sira seluk, ne’ebé Autoriedade Munisípiu Díli tau atensaun, no sei la fó autorizasaun atu halo negósiu”, relata  Joaquim.

Alende ne’e Madre Blandina Mahulag, nu’udar Koordenadora Orfanatu Santa Clara, agradese ba pessoal jestaun merkadu guarda Munisípiu Díli, ne’ebé distribui ona sasan sira ne’e ba orfanatu sira.

“Orfanatu sira ne’e klaru moris husi hetan prezente, maibé prezente ne’ebé ita espera bele fó moris ne’ebé kontenti ho laran tomak, maibé ho hanesan ne’e,  ida hanoin fó  ho laran mak pessoal jestaun merkadu sira, maibé ema hirak ne’ebé nia sasan distribui mai ami, ema hirak ne’e la iha disiplina, tanba ne’e mak halo ha’u mós  hanoin, tanbasa mak kleur tebes la kumpri atu bele disiplina hodi bele hadia nasaun ne’e”, katak Madre Blandina.oly