Dom Basílio lamenta kazu omisídiu Liquiça

Bispu Dioseze  Baucau Dom Basílio do Nascimento, hato’o lamentasaun ne’e. Tanba tuir Dom Basílio,  ema ida laiha dereitu  hasai ema  ninia vida iha mundu ne’e  ho  sasan kro’at.

Dom Basílio hato’o lia hirak ne’e relasiona ho  kazu omisídiu ne’ebé akontese iha Aldeia Bauro, Suku Leorema, Postu Administrativu Bazartete, Munisípiu  Liquiça, ne’ebé mak rezulta ema nain rua mate no  uma 13 hetan sunu no motór 7 hetan sunu no uma 3 hetan estragu.

“Ita Timor-oan husu ba malu  nusa mak violensia sira sei iha,  ita bele tuda fatuk ba malu  ita bele kondena malu, ema nia vida  ne’e osan mean  ita laiha direitu atu estraga ema ida nia isin, atu falta de’it respeita  ba ema nia naran, grave ona quanto mais hasai ema nia vida. Uluk iha tempu funu ha’u sei kompriende, la justifika buat hotu, mas ha’u kompriende”,esplika Bispu Dioseze  Baucau Dom Basílio do Nascimento,  ba GMN  Sábadu (06/07/19),  hafoin partisipa seremonia inagurasaun, sala  foun  Ensinu   Sekundáriu   Santo Estavão iha Viqueque Villa.

Tanba  ne’e, Dom Basílio, husu ba Timor-oan ida-idak atu halo reflesaun tanba saida mak violénsia kontinua akontese iha Timor-Leste.

“Ohin loron buat ida bandu de’it  ne’e ema la halo tuir, lei ho ordem iha mós  ema la tuir, ne’e duni edukasaun ne’e sai dezafiu ida, ita ida-idak ténki okaziaun hotu-hotu”,dehan Dom Dom Basílio.

Ho akontesimentu ne’e, Polísia Nasionál Timor-Leste,  liu liu-Munisípiu Liquiça detein ona suspeitu  involve iha kazu omisidiu ne’e, hodi submete ba primeiru interogatóriu iha Tribunal Distrital Díli.avi