Prevene estudante labele fuma, Rui Araújo husu ME kria atividade extra iha kada eskola

Atu prevene estudante hatoman aan labele fuma tabako, Eis Primeiru Ministru, Dutor Rui Maria de Araújo, husu ba  Ministériu Edukasaun (ME) atu kria atividade extra barak iha kada eskola.

Rui Maria de Araújo esklarese, tuir dadus ne’ebé mak Organizasaun Saúde Mundial iha katak, maioria ema ne’ebé mak fuma iha TL barak liu joven  no estudante sira .

 “Alternativa ida liu husi atividade saúde eskolar, tenki iha akonsellamentu iha eskola sira ne’e, para bele akompaña, liu-liu ita hotu hatene katak, ita-nia joven ho adolesente sira ne’e, barak liu mak sira-nia  tempu ne’e iha eskola, entaun sei iha mekanismu de akonsellamentu phisikolójiku ne’e iha eskola ida ne’e, bele sai fatór ida hodi bele ajuda”, katak Rui Maria de Araújo ba Jornalista sira iha  Hotel JL-VILA, hudi Laran Díli, Kuarta (10/7/2019).

Tuir eis Primeiru Ministru ne’e katak, númeru  utilizasaun ba sasan ne’ebé estraga ema nia saúde hanesan sigaru, alkohol no mós droga ne’ebé mak tuir dadus maioria joven no adulecente ne’e, sai hanesan preokupasaun bo’ot nasaun nian, ne’ebé presiza entidades hotu diskuti.

“Ida ne’e presiza Sosiedade Estadu tenki refleta kona ba ida ne’e, idepois hamosu polítikas klara kona ba ida ne’e”, Dutor Rui haktuir.

Tuir estatistika WHO ne’ebé iha hatutu katak, ema millaun mak mate kada tinan, tanba sofre moras ne’ebé kauza husi tabaku hanesan, moras pulmaun, kankru, struk, kankru ibun, moras iha kakorok, kakorok talin, mii fatin, kabeen fatin (kelenjar ludah) no rins, liu-liu mane sira.

Alende ne’e, iha mós ema 600,000 mak mate kada tinan, tanba simu tabaku suar husi ema ne’ebé fuma tabaku, partikularmente perigu ba inan isin rua no labarik minoridade sira.ola