Ian Martin to’o TL partisipa loron konsulta popular

Reprezentante Sekretáriu Jerál Nasoens Unidas Eis Xefe UNAMET Ian Martin, Kuarta (21/8/19), to’o iha Timor-Leste (TL) mais ou menus tuku 10:50 ho aviaun Airnorth iha Aeroportu Internasional Nicolau Lobato. Prezensa eis Xefe UNAMET Ian Martin nian ne’e atu partisipa festa aniversáriu loron konsulta populár ba dala 20 ne’ebé sei realiza iha loron 30 Agostu, tinan ne’e

Hafoin to’o iha Aeroportu simu husi reprezentante governu Sekretaria Estadu Igualidade no Inkluzaun (SEII), Maria José Fonseca.

Bainhira husu nia komentáriu kona-ba balansu dezenvolvimentu TL oras ne’e dadauk, Eis Xefe UNAMET ne’e seidauk bele esplika kona-ba progresu saida mak TL atinji ona iha tinan 20 nia laran.

Iha sorin seluk, Diretór Jerál ba Asuntu Konsolares no Média, Juvensio de Jesus Martins, hateten, tuir lolos Sekretáriu Jerál ONU António Guterres mak atu mai, maibe tanba okupadu ho servisu seluk, entaun delaga fali Ian Martin atu mai partisipa loron referendu ne’e.

“Ita atu selebra XX aniversairu ka loron konsulta popular ou referendu 30 Agostu agora ba tinan 20 ona, ita organiza eventu boot ida ne’e, tanba ne’e mak ita konvida país barak ninia xefe Estadu, xefe governu para mai hamutuk ho ita selebra loron ida ne’e”,dehan Juvensio.

Nasoens Unidas (UN) hanesan fatór determinante ida ne’ebé mak mai halo prosesu ne’e tomak hodi mai to’o iha dia 30 Agostu 1999. Tanba ne’e mak Prezidente konvida convite especial ida ba Sekretáriu Jerál ONU António Guterres, maibé Sekretáriu Jerál ONU iha okupasaun seluk entaun nia delega Ian Martin mak reprezenta nia mai partisipa komemorasaun 20 anos ba konsulta popular ne’e.

“Ita hotu hatene katak Ian Martin hanesan xefe UNAMET mai  prepara prosesu ba referendu ne’e, ne’e mak nia to’o ohin  mai iha ne’e para nia mós atu haree progresu iha Timor ne’e halonusa depois de 20 anos independensia ne’e”,dehan nia.

Ian Martin hanesan reprezentante Sekretáriu Jerál ONU sei aprezenta vídeo ida iha parlamentu Nasionál (PN) iha loron 30, no vídeo ne’e mensajen Sekretáriu Jerál ONU nian ba povu Timor tomak ba governu no mós ba Estadu ida ne’e. Alende ne’e mós nia sei partisipa inaugurasaun Ponte BJ. Habibie.

Iha tinan 1999 Ian Martin servisu maka’as hodi garante paz no estabilidade ba Timor-Leste nian. No nia mak anunsiu rezultadu referendu 1999 ne’ebé pro-independensia hetan 78,5% no pro-autonomia hetan deit 21.50%.Aes