UNDP aprezenta mensajen SekJen ONU ba PR Lú Olo

Koordenador Programa Nasoens  Unidas ba Dezenvolvimentu iha Timor-Leste,  Alex Tilman dos Santos ho nia ekipa,  hasoru malu ho Prezidente Repúblika,  Francisco Guterres Lú Olo,  hodi entrega mensajen Sekretáriu Jerál Nasoens Unidas, António Guterres nian,  atu hato’o ba povu Timor-Leste,  iha tinan 20 komemorasaun loron konsulta Popular 30 Agostu tinan ida ne’e iha Tasi-tolu.

Mensajen Sekretáriu Jerál ONU ne’e,  Alex Tilman hato’o ba Xefe Estadu kona ba livru ne’ebé ko’alia kona ba kronolojia Referendum,  no progresu dezenvolvimentu Timor-Leste nian  durante tinan rua nolu ne’e nia laran.

“Ohin ami mai hasoru Prezidente Repúblika, hodi aprezenta pakote hat, iha okaziaun komemorasaun 20 Referendum nian pakote ne’e iha video rua no livru rua, vídeo ida kona ba mensajen badak husi Sekertáriu Jerál ONU nian, Sr. António Guterres nian ba ita-nia komemorasaun aniversáriu Referendum nian ba dala rua nolu ne’ebé sei fó sai iha loron 30 fulan Agostu tinan ne’e iha Tasi-tolu, vídeo klip ida kona ba ita-nia progresu andamentu durante tinan 20 nia laran, ami mós produs livru ida  ne’ebé mak ko’alia kona ba kronolojia durante Referendum nian, eventu sira ne’ebé mak akontese iha durante referendum nia laran no livru ida kona ba buat sira ne’ebé mak ita konkista durante tinan rua nolu nia laran,  kona ba eleisaun ne’ebé ita halo ho susesu, ita-nia dezenvolvimentu, ita-nia demokrasia para hatudu ba mundu katak, durante tinan 20 nia laran, maske nasaun ida ne’ebé mak sei joven maibé, bele halo ona buat barak”, informa  Alex Tilman dos Santos    ba jornalista sira, hafoin hasoru malu ho Prezidente Republika, Francisco Guterres Lú Olo, iha Palásiu Prezidiensial Nicolau Lobato Bairo Pité Díli Kuarta (28/8/2019).

Alex haktuir, Konteudu husi filmajen no livru kona ba Referendum no mudansa dezenvolvimentu ne’ebé mak akontese ona durante tinan 20 ne’e, alende atu hadutu ba mudu katak,  maske TL foin hetan nia ukun aan maibé, bele halo ona buat barak,  konteudu husi filmajen no livru ne’e mós hanesan motivasaun ida atu entidades hotu iha TL bele esforsu aan liu tan hodi dezenvolve nasaun ne’e ba oin ho di’ak liu tan.

Mensajen Sekretáriu Jerál Nasoens Unida nian  ba komemorasaun loron konsulta popular ba dala rua nolu  no filme kona ba progresu dezenvolvimentu Timor-Leste nian  durante tinan  rua nolu ne’e,  sei fó sai ba públiku  iha loron komemorasaun konsulta popular  ba dala 20  iha loron tolu nolu fulan Agostu ne’e iha Tasi-tolu Díli.ola