AHI HAN UMA 100 IHA ERMERA, VÍTIMA SIMU ONA APOIU HUMANITÁRIA

Ahi han mutuk uma atus ida resin (100) iha Munisípiu Ermera, no dadaun ne’e vítima sira husi insêndiu ne’e, simu ona ajuda humanitaria husi governu no Mercy Corps Cruz  Vermelha Timor-Leste.

Ajudu  sira  ne’e,  simbolikamente entrega husi Sekretáriu Estadu Protesaun Sivíl, Alexandrino Xavier  Araújo ba   vítima  sira. Ajudu  humanitáriu   sira  ne’e mak   hanesan, terpal, ikan lata,  supermi, foos, basia,   sanan,  muskateiru, bikan han  no seluk tan.

“Husu ba  imi bainhira simu  han hodi mehi servisu kontinua  oinsá mak hadia  ita-nia uma. Klaru  que  ida  ne’e primeiru apoiu, ida  ne’e apoiu emerjensia maibé, iha apoiu rekoperasaun ba hadia  uma  ne’e só bainhira  foti fali dadus  husi Munisípiu”,esplika  Alexandrino Xavier  Araújo,  Kinta (03/10), iha   Suku Mau-Ubu, Postu Administrativu Hatolia B Munisípiu Ermera.

Aliende ne’e, deputadu Parlamentu Nasionál,  Domingos   Lemos, tu’un diretamente,  hodi haree rasik ho matan no rona preokupasaun husi komunidade sira kona-ba insêndiu ne’e.

“Ha’u hakarak  hatete, prevensaun  ita ténki halo,  ita halo to’os  ita  ténki prevene  mós  ahi,  prevene mós husi dezastre  ne’ebé mak  ita la espera, se ida  ne’e mak ita la tau importansia. Hanesan  Xefe Suku dehan ona,  kafé no to’os sira-nia prosesu  oinsa maibé,   governu  nia intensaun ne’e salva ema nia vida  ne’e mak uluk, haree ema ne’e horikalan  han saída, família sira afeta dezastre ne’e horikalan  toba iha ne’ebé. Entaun urjentimente ténki rezolve uluk situasaun ida  ne’e.  Ne’e mak ohin Sekretáriu Estadu Protesaun Sivíl Alexandrino lori hela apoiu ne’e mai fó hela ba ita bo’ot sira, depois mak ekipa levantamentu  mai halo fali levantamentu ba ita bo’ot sira-nia rai to’os, uma no kafé  no seluk tan”, dehan deputadu Domingos   Lemos.

Domingos   Lemos haktuir,  Estadu sei la taka matan ba situasaun ida ne’e.

“Saída mak akontese ona, akontese ba maibé,  fuan bo’ot nafatin simu realidade ida  ne’ebé mak iha, tanba  ita la espera dezastre ne’e bele akontese. Depois situasaun ida  ne’e iha segunda feira  iha plenária Parlamentu ami sei deskuti hodi haree levantamentu ida ne’e inkamiña ba governu  atu haree saida mak  ita bo’ot sira sofre hela”,dehan Domingos   Lemos.

Nune’e mós  abitante  Herculano  Salsina  Soares, agradese ba apoiu ne’ebé mak governu no mercy Corps Cruz Vermelha fó ona ba sira.

 “Ha’u nia  uma ahin han   hotu ne’e mak ha’u mai  simu sasan hirak ne’e. Tan  ne’e sasan sira atu barak  ka uitoan simu de’it”,dehan  Herculano Salsina.

Aliende ahi han komunidade nia uma, iha insendiu ne’e mós, ahi han mutuk  ema na’in rua kanek iha ain no isin lolon.  Tan ne’e ekipa Cruz Verlemelha atende hodi hamos kanek sira  ne’ebé mak vítima  sira  infrenta.

Insêndiu iha   iha Munisípiu Ermera ne’e akontese iha Kuarta (02/10/19), mais ou menus tuku 11:00 Otl meudia  to’o   Kinta (03/10/10) kalan.