FONGTIL : La’os tempu koalia Eleisaun Antesipada

Diretór Ezekutivu Forum Organização Não Governamental Timor Leste (FONGTIL), Daniel Santos do Carmo, hatete la’os ona tempu atu koalia Eleisaun Antesipada (EA), maibé hanoin oinsa atu halo dezenvolvimentu no hadia povu nia moris.

Diretór Ezekutivu FONGTIL hato’o lia hirak nee ba JNDiário, relasiona ho deklarasaun Primeiru Ministru Taur Matan Ruak nian nebe koalia konaba eleisaun antesipada wainhira laiha solusaun ba lista membru governu pendente.

“La’os tempu atu koalia kona-ba eleisaun antesipada, maibé tempu atu buka solusaun ba problema sira ne’ebé akontese iha rai laran liu-liu problema povu nia moris di’ak ba futuru”, dehan Daniel Santos.

No konaba membru Governu sira ne’ebé seidauk simu pose, Daniel enkoraza ho boa vontade  kandidatu sira ne’e bele rezigna-an  tuir ezemplu ne’ebé, lider rezisténsia Xanana Gusmão hatudu ona.

 “Sé akontese duni eleisaun antesipada semak lori konsekuensia bo’ot liu povu ne’e, povu sei sofre, sira nia oan eskola ladiak, sira sei la asesu saude diak, agriklutura lá la’o diak, tanba Estadu konsentra deit ba eleisaun,” perokupa Daniel Santos do Carmo.

Lider maximu FONGTIL dehan, “Intermus Estadu ne’e frazil, tanba ita labele dezenvolve ita sistema saude ho diak, ita labele dezenvolve eskonomia ladiak, dezenvolve sistema edukasaun iha rai laran mos lao ladiak, nomos labele dezenvolve sistema seguransa la’o ladiak, tanba ita fokus deit ba eleisaun, agora ita nia problema rai laran seida’uk lo’os, atendementu publiku mos problema lo’os, ema atu halo negosiu mos susar, podia ita fokus ba problema sira ne’e la’e, tanba sasan sira ne’e labele rezolve ne’e mak dehan Estadu frazil,” dehan, Daniel Santos do Carmo.

Nia akresenta katak, partidu sira ne’ebe mak hetan asentu iha Parlamentu Nasional sira sei kontinua hetan prefilezu katak sira sei mantein ho votus ne’ebe mak sira iha, ne’e laiha ema ida mak bele halo prediksaun.

Lori sosiedade sivil nia naran rekomenda ba povu sira atu labele komete errú politik sira hanesan ne’e, povu tenke hatene katak ema sira ne’ebe hili tiha ikus mai lá responde kompremisiu politik sira ne’e di’ak liu povu lori nia direitu ne’e atu desidi.

“ Ema sira ne’e mak nafatin tún ba iha baze hato’o sira kumprimisiu politik sira ne’e, no la rezolve problema sira ne’e, no povu kontinua hili sira entaun povu komete errú politika ne’e,” dehan, Daniel Santos do Carmo.

Nia konsidera eleisaun antesipada sei gasta deit rekursu barak, tanba ne’e di’ak liu lider sira tur hamutuk buka solusaun hodi hakotu porblema iha rai laran.

Timor – Leste hafoin restaurasaun indepedensia iha 2002, halao ona eleisaun antesipada dala ida iha 12 Maiu 2018, primeira ves iha historia iha nasaun foun nee. Eus