Mate-isin eis MD Cirilio translada ona mai TL

Mate-isin Eis Ministru Defeza (MD) Timor-Leste, Cirilio Cristovão halo transladasaun mai Timor-Leste, iha Tersa, loron 22, fulan ne’e, hafoin hakotu ís iha Domingu, loron 20 kalan, fulan Outubru, iha tuku 07:45, iha Indonesia wainhira hala’o hela tratamentu saúde iha ospital Bros Bali.

Tuir planu mate-isin ne’e sei halo transladasaun mai Timor-Leste ho aviaun komersial Sri Wijaya no família sira sei simu iha aeroportu internasional Prezidenti Nicolau Lobato, Comoro-Díli.

Entretantu iha Segunda, loron 21, família husi matebian halo ona preparasaun iha ninia rezidénsia Praia dos Coqueiros-Díli, hodi hein mate-isin to’o mai no iha loron ne’ebé hanesan matebian nia Espoza,  Brígida Antónia  Correia hamutuk ho família sira desloka ona ba Bali-Indonesia,  hodi halo preparasaun ba prosesu transladasaun mai Díli.

Tuir planu, mate-isin sei hatur kalan ida iha ninia Rezidénsia Praia dos Coqueiros-Díli, antes lori fali ba ninia moris fatin Lospalos, hodi halo serimonia funébre, tuir tradisaun munisípiu Lautem.

Matebian Cirilio Cristovão sai Ministru Defeza (MD), iha VI Governu Konstitusional no antes ne’e, nia asumi kargu nu’udar Xefi Komisaun Verdade no Amizade Timor-Leste-Indonesia no Diretor Servisu Nasional Intelijénsia. eni