Oan Soru : Verifikasaun dadus agora nee laiha ona aman sarani

Sekretario Estadu Veterano no Kombatetes Libertasaun Nasional, Gil da Costa ‘ Oan soru’ hatete verifikasaun ba dadus veteran nian agora nee laiha ona aman sarani, tanba ekipa verifikasaun deside iha Munsipiu dehan A  nee A ona sei la mai tan hadia iha nasional.

Governante nee hato’o lia hirak nee iha serimónia juramentu ne’e ba ekipa verifikadór sira ne’ebé  atu hala’o sira nia servisu verifikasaun dadus veteranus no kombatentes libertasaun nasionál, iha Jardim Heroisn da Patria Mateinaro.

Juramentu nee ba ekipa responsável verifikasaun dadus veteranus no kombatentes  husi Rejiaun lima  hamutuk 170, antes tu’un ba terrenu hodi hala’o sira-nia servisu verifikasaun dadus veteranu sira nian.

Sekretáriu Estadu Kombatentes Libertasaun Nasionál, Gil da Costa ‘Oan Soru’ hatete, serimónia juramentu ne’e hanesan foin ba dala uluk liu akontese iha mandatu VIII governu, ba ekipa verifikadór sira ne’ebé  atu hala’o sira nia servisu verifikasaun dadus veteranus no kombatentes libertasaun nasionál.

“Interpretasaun ne’e mak sala, ema balu hanoin katak, ohin nia fó kartus karegador ida aban nia veteranu ona, ne’e sala. Veteran ne’e atu ko’alia lolos hanesan ne’e, nia hahú partisipa iha organizasaun ba rejistensia ne’e iha sa tinan no remata iha sa tinan, maibé lahatete katak, ema ida ohin fó kilat ida, aban sai veteranu ona. Hanesan alin balu ko’alia katak, nia tula komandante Rejiaun 2 ne’e, la signifika katak, ita tula komandante ida ohin, aban ita ko’alia dedikasaun 8 a 14 ona, lei la hatete hanesan ne’e. Tanba ne’e husu ba públiku hotu atu aprezenta dadus ne’ebé los, atu nune’e Governu bele prepara polítika ruma hodi fó resposta, espesial ba valorizasaun ne’ebé justu ba ema hotu”, hatete Zil da Costa ba jornalista iha Simitériu Heroi Metinaro, Sesta (11/10).

Nia haktuir, juramentu ne’e sai hanesan métodu ida atu verifika dadus tuir buat ne’ebé lós no justu, tanba durante ne’e públiku preokupa los ho dokumentu ba veteranus nian, ema balun dehan veteranus falsu maibé, la’os veteranu mak falsu maibé, la’os veteranus mak falsu maibé, dokumentu ne’e mak falsu atu sai veteran.

 “Ekipa responsavel sira mai husi Munisípiu 12 inklui RAEOA ne’e, atu halo juramentu antes atu tun ba baze hodi halo verifikasaun, no responsavel sira ne’e sei tu’un hodi  kontinua aplika juramentu ne’e ba iha nurep, selkom iha Munisípiu hotu, ho objetivu ekipa verifikador sira bele servisu tuir estatutu kombatentes libertasaun nasional, hodi evita falsifikasaun dokumentus”,

Alende ne’e, Veteranu  Franscisco Doutel Sarmentu “LAMESAK”, senti kontenti ho juramentu ne’e, no sei aplika iha baze buat ne’ebé nia hetan iha metinaro, no sei servisu tuir lei estatuto kombatentes libertasaun nasional.

Tuir ajenda programa verifikasaun dadus nian, servisu ne’e  sei hahú hala’o iha loron 15 fulan ne’e, hahú husi Munisípiu Aileu.

Antes hahú juramentu, ekipa verifikadór sira mós tuir formasaun kona ba verifikasaun dadus  ne’ebé oferese husi Sekretáriu Estadu Kombatentes Libertasaun Nasionál, Gil da Costa, no parte governu sei fasilita transporte ba ekipa responsavel sira, kada Munisípiu kareta 3.

Sei verifika fali veteran sira ne’ebé simu ona pensaun

Alende ne’e, Sektretariu Estadu Asuntu Kombatentes Libertasaun Nasional, Gil da Costa ‘Oan Soru’ husu ba ekipa verifikador sira servisu tuir  estatuto kombatentes libertasaun nasional.

Oan Soru esklarese,  problema veteranus nian to’o agora seidauk rezolvidu, tanba responsavel sira halo falsifikasaun dokumentus.

  “Ema hotu ne’ebé mate iha funu laran hakarak sai 8-14 hotu maibé, tenki buka tuir didiak, tanba iha tempu funu laran hansip ho tentara no traidor sira mós barak mak mate, no balun moras mak mate maibé, hot-hotu hakarak sai martires hotu, neduni tenki para ho buat sira ne’e hodi buka hatene lolos no haree lai nia mate, tanba saida mate tanba ukun aan ou tanba intregasaun los FALENTIL ida ho tentara ida tiru malu mate tiha, na’in rua ne’e martires hotu ne’e lalos, ema balun uluk FALINTIL sira hadau kilat husi tentara sira ne’e agora sai veteranus  hotu”, hateten Gil

Nia dehan ekipa verifikadór sira ne’e, sei  verifika fila fali no sei halo juramentu ba veteranu sira ne’ebé simu ona pensaun husi Estadu, nune’e bele hatene ninia dedikasaun servisu   tuir estatutu verifikador sira sei buka tuir hodi fó resposta didiak ba veteranus sira ne’ebé simu ona pensaun tuir giun ne’ebé iha, tanba iha inan aman balun nia oan nain rua tentara, nain ida FALENTIL maibé, sai martires hotu  para bele hetan  pensaun husi Estadu  ne’e labele akontesetan ona.aba