Obralan Aimutin no Ponte Komoro 3 prontu muda ba Manleuana

Vendedor  sira ne’ebé fa’an roupa obralan iha  Aimutin no Ponte Komoro 3,  prontu atu muda ba merkadu Manleuana,  bainhira governu prepara ona kondisaun.

Ermeljilda Fátima Cristinha  da Costa  hatete, Autoridade Munisípiu Díli ne’ebé antes ne’e fó ona ultimatum atu muda ba iha merkadu Manleuana  maibé, to’o agora seidauk realize, ne’eduni vendedor sira sei kontinua fa’an hanesan bai-bain iha Aimutin, to’o tempu Governu hakarak muda, sira prontu atu muda  ba merkadu  Manleuana hodi halo negósiu hanesan bai-bain.

“Ami prontu atu ba merkadu Manleuana  maibé, presiza kria kondisaun ne’ebé diak para ami halo negósiu mós senti diak, ne’eduni ami hein deit governu nia tempu atu muda ami ba Manleuana, sei karik sira mai ami prontu atu koopera ho governu hodi ba fa’an iha Merkadu Manleuana maibé, antes muda sai ami husi fatin ne’e, tenki kria uluk fatin no fasilidades kompletu, nune’e bele fasilita ami halo negósiu ho diak hodi sustenta moris”,  hatete Ermeljilda Fátima Cristinha  da Costa ba GMN iha Aimutin Díli Kuarta (09/10).

Nia realsa, vendedor sira ne’ebé halo negósiu iha Aimutin, halo ona koordenasaun entre sira iha fatin refere, hodi prepara aan atu muda ba iha merkadu Manleuana maibé, preokupasaun sira mak governu prepara ona fatin ba sira ka lae.

“Iha semana ne’e ami halo ona koordenasaun ba malu  hodi prepara, hein Munisípiu sira mai prontu atu muda ba Manleuana maibé, governu mós presiza rona ami nia preokupasaun sira kona ba, fatin negósiu ho fasilidades hanesan, saneamentu iha ona ka la’e, karik seidauk iha ami hotu lakohi ba, kontinua fa’an iha Aimutin”, katak Ermeljilda.

Nune’e mós vendedor  Eusebio da Cruz de Jesus hatete, antes atu muda, governu tenki rejistu uluk  hodi hatene total vendedor aimutin, nune’e labele hadau malu no bele hatene vendedor hira mak atu ba merkadu Manleuana.

 “Ha’u husu ba governu, antes atu muda ami ba merkadu Manleuana, tenki rejistu uluk lai, nune’e bele hatene total vendedor iha aimutin ne’e hira, nune’e to’o muda labele hadau malu ba fatin”, katak Eusebio.

Iha parte seluk, Xefe Jestaun Hijene Merkadu Munisípiu Díli, Berta Santa Gonçalves Veira hatete, tempu badak Guarda Munisípiu Díli sei servisu hamutuk ho Polísia Munisípiu Díli sei muda vendedor obralan Aimutin no Ponte Comoro 3 ba merkadu Manleuana.

“Iha tempu badak ita sei muda, hein orentasaun governu sentral, bainhira orden tu’un, guarda Munisípiu Díli prontu atu kolabora ho polísia Munisípiu Díli atu ezekuta orden hodi muda sai vendedor”, katak Berta.aba