PN husu Governu apoia inisiativa veterana Kasian harii eskola

Deputadu bankada PUDD, António de Sá Benevides, husu Oitavu Governu Konstitusionál, atu prevê orsamentu, hodi apoia inisiativa veterana Madalena Bidau Soares, alias Kasian, ne’ebé ho inisiativa di’ak harii eskola, ho subsídiu veteranus nian ne’ebé nia hetan, hodi prepara joven sira ba futuru Timor-Leste nian, hodi sai lutador ba dezenvolvimentu iha era ukun rasik aan.

“Ita-nia veterana Kasian ne’ebé harii eskola infantil tolu, ho nia osan rasik, uza osan veterana nian ne’ebé nia simu, maske limitadu maibé nia konsege konstroe eskola tolu ne’e, nia konsege atinji ona 60% husi eskola ne’ebé nia halo rasik. tanba ne’e, husu ba ministra edukasaun, atu bele halo to’ok avaliasaun ba ida ne’e, bele ka lae, presiza duni ministériu edukasaun atu fó ajudu ruma”,hatete António de Sá Benevides iha plenária semana ne’e.

Alende ne’e, representante povu ne’e mós, husu governu, atu aprezenta relatório kona-bá edukasaun nian, iha eskola hira mak konsege konstroe, iha ezekusaun OJE 2019 nian, nune’e bele apár ho proposta OJE 2020 nian.

Hatán ba kestaun ne’e, Ministru Reforma Legislativa no Asuntu Parlamentares, Fidelis Magalhães akresenta, nia parte sei informa asuntu refere ba ministériu relevante, hodi bele hetan resposta, no bele koloka mós informasaun direita, perante diskusaun OJE 2020 nian, ho Primeiru Ministru no ministru relevante sira.say