Sahat Sitorus triste negosiante Kampung Alor fila ba Indonézia

Embaixadór Indonézia iha Timor-Leste, Sahat Sitorus, hateten nia sente triste tanba negosiante estranjeira sira iha Kampung Alor barak deside fila ba Indonézia, tanba konsidera folin selu taxa ás liu hafoin simu desizaun Governu Timor-Leste (TL) hodi muda ba Golgota mall.

Sahat Sitorus hateten kestaun ne’e hafoin hasoru malu ho Prezidente Repúblika, Francisco Guterres Lú Olo, iha palasiu prezidensial Nocolau Lobato Bairo Pite, Díli, Tersa (08/10/2019).

Reprezentante Estadu Repúblika Indonézia iha Timor-Leste, Sahat Sitorus hateten, Maske nune’e Sahat Sitorus mos husu ba negosiantes sidadaun estranjeira Indonézia hanesan bainaka tenke kumpri desizaun husi Governu Timor-Leste nian.

“Ha’u rasik rona katak iha negosiante balu mak hakarak fila ba Indonézia, e tuir lolos ha’u triste oituan wainhira ida ne’e akontese, tanba sei fó impaktu ba kampu trabalho iha Timor-Leste sei menus, no komunidade sidadaun Timor-oan Kampung Alor hanesan na’in ba rai mos nia rendimentu la iha ona, tanba negosiante sira governu muda tiha ba Golgota Komoro. Maske nune’e ha’u hanoin ida ne’e seidauk tarde, dala ruma depois governu sei prepara mos uma ba negosiante sira atu hela, nune’e bele hamenus sira nian gastus”, afirma Sahat Sitorus.

Governu Timor-Leste liu husi Ministériu Komérsiu Indústria hahú muda ona negosiante estranjeira sira ba Golgota Komoro, tanba tuir planu mall Golgota ne’e sei inaugura iha loron 10 fulan Outobru ne’e husi governu atual. Negosiante sira sei selu taxa ba Estadu Timor-Leste ho folin dolar amerikanu atus lima kada fulan. Ito