Junta Médiku Nasional seidauk simu informasaun kona-bá Julião Mausiri nia moras

Prezidenti Junta Médiku Nasionál (JMN), Marcelino Correia, hateten, dau-daun ne’e, nia parte seidauk simu informasaun husi médiku sira kona-bá pasiente Julião Mausiri “Zebra Metan” nia moras.

“Kona-bá pasiente Mausiri ami  seidauk simu informasaun ida kona-bá dehan atu ba halo tratamentu iha rai liur no to’o agora seidauk  iha médiku ida maka mai aprezenta nia kazu iha ne’e, ne’ebe ami junta médiku seidauk hatene katak, pasiente ne’e ho problema saída no tansfere ba halo saída no médiku ida ne’ebé mak haree nia durante ne’e”, Prezidenti JMN ne’e ba GMN iha ninia kna’ar fatin Hospital Nacional Guido Valadares (HNGV), Segunda, (11-11-2019), hodi responde kona ba Komite Orientador 25 ne’ebé husu governu atu transfere urjenti Mausiri ba halo tratamentu iha Malaysia.

Marcelino Correia esplika, espesialista iha HNGV tenki haree uluk lai pasiente nia-moras, antes desidi transfere hodi tratamentu iha rai-liur.

“Tuir lala’ok ne’e, primeiru star tenki iha médiku espesialista ida iha HNGV ne’e haree uluk tiha nia lai, depois halo tratamentu ba nia, kuandu nia moras ne’e ultrapasa médiku ida haree ne’e, ho ita nia rekursu umanu ne’ebé la sufisiente para atu bele haree moras ne’e ou ita nia aparelu ekipamentu iha ospital ne’e la adekuadu para atu halo diagnosa ba moras ne’e, foin mak ita hanoin oinsa atu transfere moras ne’e ba iha fatin sira ne’ebé mak ita iha ona akordu”, katak nia.

 Entretantu família pasiente, Manuel Mausiri, hateten, ninia alin Zebra moras komesa iha tinan 2017, bainhira nia hala’o hela servisu iha kantor, depois  família sira desidi lori  ba HNGV, hodi  konsulta ba ninia moras.

“Momentu  ne’ebá  CT Scan at tiha, maibé família sira tenta hakarak buka hatene Zebra nia moras, opsaun ikus para bele halo referal ba fatin sira seluk  ne’ebé iha ekipamentu kompletu, para bele deskobre loloos moras  iha ulun  ne’e, maibé  buat sira hotu la akontese”, tenik Manuel Mausiri.

Tuir informasaun ne’ebé fó sai iha média nasional, deskonfia pasiente Zebra Metan sofre moras tumor.

Relasiona ho kestaun ne’e, wainhira GMN tenta konfirma ho espesialista ne’ebé durante ne’e halo atendementu ba Zebra Metan, maibé nia rezeita fó komentáriu, tanba tenki hetan autorizasaun husi brigada. eni