Komunidade Aileu lakohi entrega rai ba Governu hodi uza ba sidade universidade

Komunidade munisipiu Aileu ho lian ida hodi lakohi entrega rai ba Governu hodi halo konstrusaun ba sidade Universidade iha Aileu.

Komunidade afetadu ba konstrusaun sidade universidade, Elsa Xavier, la aseita atu fó rai sira nebe sira hela ba nee  ba governu , tanba rai mamuk iha Aileu sei barak.

“Ami husu ba Governu no ministériu relevante sira katak,rai ne’e laos ida ne’e de’it,maibé rai iha munisipiu Aileu ne’e iha fatin 3 ou 4 luan para mate nune’e nusa la ba halo iha ne’ebá ,maibé tenki halo iha rai ida ne’ebé ami hela, ami ladun aseita,tamba rai ne’e potensia no produtivu tebes nune’e ami bele uza hodi buka osan no sustenta ami nia  moris loro-loron”, hatete Elsa Xavier, iha diálogu ho Primeiru Ministru Taur Matan Ruak, Kinta (14/11), iha salaun Administrasaun Munisipiu Aileu.

Iha diálogu ho Primeiru Ministru Taur Matan Ruak, komunidade afetadu ba konstrusaun sidade Universidade husu ba Governu atu tetu no hanoin didiak ,wanhira muda sira husi fatin refere ,tamba fatin nu’udar sira nia rai ida ne’ebé sira uza hodi kuda produtu no buat barak ba sustenta familia nia moris.

Hatán ba preukupasaun ne’e Primeiru Ministru Taur Matan Ruak, kompromete, Governu sei hamutuk ho ministériu relevante sira ne’ebé iha futuru implementa projetu sidade universidade Aileu ne’e, hodi responde ba halerik ne’ebé komunidade afetadu hato’o ona ba Governu.

Xefe Governu ne’e mós sei la husik nia povu sai terus no tanis ,tamba interese públiku no nasionál nian, nune’e nu’udar ukun nain promete sei orienta ministériu relavante sira ne’ebé atu implementa projetu refere atu responsabiliza ida ne’e, antes muda komunidade afetadu.

Taur Matan Ruak promete sei koalia didiak no sei muda komunidade sira nebe afetadu husi programa harii sidade universidade ho digno liu husi dalan indiminizasaun.

Iha uportunidade nee, Ministru Ensinu Superior Siénsia no Kultura, Longuinhos dos Santos esplika, rai ne’ebé atu hala’o konstrusaun sidade universidade Aileu ne’e lokaliza iha aldeia Sari, suku Bandudatu Lausi, postu administrativu Aileu, Munisipiu Aileu.

Komunidade nebe hetan afetadu ba obra sidade universidade Aileu ne’e hamutuk xefe familia 46 no konstrusaun refere sei okupa rai hektares 36.

Harii sidade universitariu iha Aileu nee nudar programa prioriedade Aliansa Mudansa ba Progresu (AMP) iha kampaña eleitoral 2018 iha Munisipiu Aileu.

 Dialogu nee akompaña husi Ministru Obras Públikas Salvador dos Reis Pires,Ministru Defeza no Interior Interinu Filomeno paixão,Sekretáriu Estadu Terras no Proriedades Mario Ximenes ,administradór munisipiu Aileu no autoridade local.Tos