OSF: Impase polítiku hafraku ekonomia rai-laran

Organizasaun Sagrada Família (OSF) ezije líder nasionál istóriku sira atu diálogu hodi rezolve tiha impase polítiku ne’ebé la’o kleur ona durante ne’e, tanba hafraku ekonomia rai-laran.

Membru Organizasaun Sagrada Família nia ezijensia ne’e hato’o liu husi konferensia imprensa ne’ebe hala’o iha Fatuhada, Díli, Segunda (04 /11/2019).

Porta voz Jaime Agostinho Hanjam, hatete impasse politika iha Timor-Leste hafraku no fó dezvantazen ba dezenvolvimentu ekonomia rai laran, tanba ne’e husu líder nasional historiku sira, liliu Prezidente da Repúblika Fracisco Guterres ‘Lú Olo’ ho Primeiru Ministru Taur Matan Ruak atu halo dialogu hodi hakotu impasse polítika rai laran.

Organizasaun Sagrada Família ezije mos governu tenke kria kompañia estatal atu kria kampu servisu ba juventude sira iha teritóriu Timor-Leste.

“Kondisaun polítika ne’ebe akontese iha rai laran, sei hafraku ekonomia nasional. Organizasaun Sagrada Família husu ba Prezidente da Repúblika no Primeiru Ministru atu hakotu impasse polítika ne’ebe sei fó dezvantazen ba prosesu dezenvolvimentu nasionál nian. OSF mos husu ba governu atu kria kompañia estatal atu kria kampu servisu ba joventude sira iha teritóriu Timor-Leste,” hateten Porta voz OFS, Jaime Agostinho Hanjam.

Sekretáriu Jerál Interinu Organizasaun Sagrada Família, Antero Bendito da Silva ‘We-Anin’, hateten Timor-Leste tenke iha nia vizaun konjuntu konaba dezenvolvimentu nasionál no atu atinji ida ne’e mak liu husi dalan dialogu.

“Dialogu labele mamuk deit, dialogu tenke ho objetivu ruma, iha buat barak ne’ebe partidus politkus sira, lideransa sira, no movimentu sosiais sira, inklui organizasaun sosiedade sivil hanesan Igreja nia reprezentante sira bele halo dialogu. Ida mak konaba ita nia vizaun konjuntu nasionál, tinan 50 mai oin Timor atu la’o oinsa. Ita koalia bebeik konaba Timor ida ne’ebe foun no sustentavel, maibe presija nia konteudu. Planu estratejiku ne’e bele sai matéria ida ba dialogu nasionál, atu hotu-hotu iha plataforma ida, atu halo dialogu, hafoin mak tama asuntu seluk inklui problema governasaun. Buat hirak ne’e presiza ezijensia mos husi povu, nasaun tomak atu tulun líder sira e partidu sira atu halo dialogu,” hateten Sekretáriu Jerál Interinu OSF, Antero Bendito Da Silva ‘We-Anin’.

Organizasaun Sagrada Família núdar organizasaun masa rezistensia nian, funda husi eis gerileiru komandante rejiaun tres, Cornelio da Conceição Gama L7 hamutuk ho kompatriota sira seluk hodi kontribui luta to’o independesia Timor-Leste nian. Ito