Bee-Mota sai alternativu ba komunidade Alas

Komunidade Postu Administrativu Alas, Munisípiu Manufahi, obrigadu konsumu bee-mota lor-loron, tanba durante ne’e komunidade sira iha Alas la asesu ba bee moos.

Tuir habitante Leopoldino Fernandes,  lor-loron sira tenke la’o ain ho distansia dok hodi bele kuru bee mota hodi uza ba sira-nia nesesidade lor-loron nian hanesan han no hemu.

Situasaun ida ne’e akontese tanba iha tinan ida ne’e akontese mudansa klimátika bai loron naruk hodi halo bee moos iha Postu Administrativu Alas maran hotu.

“Koalia kona ba be mos jeral ba alas hut-huto iha fulan agostu to mai fulan dezembru tinan ida nee laiha asesu ba be tamtu liderasan komunitaria iha nee autoridade local  hamutuk ho komunidade mak sente  dereita be nee mais lahatene ita nia nai ulun sira  aouturidade local sira planu konaba be nee ba oin ami  renu la hatene”, dehan abitante, Leopoldino Fernandes, foin lalais ne’e.

Administradór Postu Alas, Leopoldo Barreto hateten,  problema kona ba bee moos ne’e kleur ona.

Hanesan Administrador Postu Alas, Leopoldo Barreto hato’o ona proposta ba Governu, liu-liu ba  diresaun agua e saneamentu, maibé  to’o agora seidauk iha solusaun.

“Tinan ba tinan  husi 2015 too agora sei dauk iha atende mentu nebe maximo konaba problema  be mos nee  durante ita kopera deit ho ONG sira  nebe mak bele apoiu  mantesaun  kiik ba  fasilidade be mos maibe ida nee labele resolve  nebe problema husi uluk  too  agora nee nafatin”,dehan Administrador Postu Administrativu Alas, Leopoldo Barreto.

Ho situasaun ne’e, komunidade ho sira-nia inisiativa rasik kee bee possu iha sira nia hela fatin ho klean metru sanulu resi lima  atu sira bele konsumu  ba nesesidade lor-loron nian.GMN