Festeza Natál Hamutuk, Jorge Serrano agradese funsionáriu GMN tomak

Funsionáriu Grupo Media Nacional, Sesta (27/12/19), hala’o festeza Natál Hamutuk Iha Otél Vila Verde, Díli. Iha okaziaun ne’e Prezidente Konsellu Grupo Media Nacional, Jorge Manuel de Araújo Serrano, agradese funsionáriu GMN tomak ne’ebé iha korajen servisu hodi serví públiku.

Jorge Serrano hateten, GMN hanesan família bo’ot ida no agradese tebes ba inisiativa husi diresaun tékniku ne’ebé mak realiza ona seremonia Natál Hamutuk ne’e maske situasaun rai-laran la’o ladun diak.

“Tinan ida ne’e, ita mak tenke solidariza situasaun ida ne’e. Imi hotu servisu iha media imi hatene situasaun Timor nian oras ne’e dadauk. Ema balu telefone ba ha’u fo boas festas santo paskoa. Tanba sa mak na’e? Maun ita haree hanesan paskoa fali, laos Natál ida. Ema balu koalia hanesan ne’e. Ne’ebé ita-nia situasaun mak ne’e,”dehan Prezidente Konsellu Admininistrasaun GMN, Jorge Serrano, hodi agradese funsionáriu GMN tomak ne’ebé iha inisiativa hodi halo Natál Hamutuk ida ne’e.

Natál hamutuk ne’e, laos GMN Holding mak halo, maibe husi funsionáriu GMN sira mak halo. “Imi nia insiativa pronto ha’u agradese. So que ha’u fó apiu deit,”dehan Prezidente GMN, Jorge Serrano.

Prezidente Konsellu Administrasaun GMN mos hatutan, maske GMN iha situasaun ne’ebé ema hotu tau matan, balun krítika, balun apoia maibe GMN kontinua la’o ba oin hodi lori nafatin Timor ba mundu.

Argentina Cardoso hanesan Komisaun Organizadora hateten, objetivu husi Natál hamutuk ne’e oinsa atu motiva nafatin funsionáriu GMN sira ho inovasaun iha tinan foun mai.

“Ne’e hanesan hodi motiva funsionáriu GMN sira tomak,”dehan Argentina Cardoso.

Partisipa iha seremoia Natál hamutuk ne’e, Presidente Consellu Administrasaun GMN, General Manager GMN, Diretor Tekniku, Diretor Informasaun, Diretor Rekursu Umanu, Diretor IT.

Natál hamutuk GMN nian tinan  ne’e la partisipa másimu husi membru Grupu Media Nasional hotu, tanba okupadu.  Seremonia Natál hamutuk ne’e remata ho divertementu hamutuk.

Grupo Media Nacional kompostu husi GMN TV, Online, Jornal Nacional Semanário, Jornal Nacional Diário, no Radio Nacional FM.GMN