Konsellu Veteranu verifika ona dadus 11.000 resin

Sekretáriu Estadu ba Asuntu Kombatente no Libertasaun Nasionál, Gil Da Costa ‘Oan Soru’, hateten,  durante Konsellu Veteranu  hahú nia servisu iha 15 fulan Outubru tinan ne’e, konsege halo ona verifikasaun dadus ba ema rihun sanulu resin ida.

Maibé Oan Soru hateten, hanesan Sekretáriu Estadu ba Asuntu Veteranus nian, nia labele promete tempu  bainhira mak verifikasaun dadus ne’e bele konklui,  tanbá tuir dadus ne’ebé iha, Konsellu Veteranus sei halo verifikasaun ba  ema rihun atus ida rua nulu resin  hat atus nen (124,600).

 “Atu dehan deit, Primeiru rejistu ba veteranus ba 2003 no 2005, verifika ona, ema balun simu ona pensaun, maibé dadus pendente sei iha hela, sei entrega ba Konsellu Veteranus atu konklui, verifikasaun ne’e halo ba ema husi 124,600 resin agora verifika iha fulan rua nia laran to’o ona 11 mill resin”, dehan Gil Da Costa Oan Soru iha Palasiu Prezidensial, Sexta (13/12/2019).

Tuir Gil da Costa verifikasaun ne’e halo laos atu diskrimina ema ruma,  maibé atu hatene tuir partisipasaun  no kontribuisaun  husi veteranus idak-idak tuir lolos nia tempu no fatin.

“Vetaranu laiha ida uluk no agora, maibé ema mak gosta intrepreta sasan tuir idak-idak nia hakarak, tanba teknolojia mós modernu, veteranu ne’e ida deit, ita aproveita koridor veteranus ne’e tuir hakarak rasik”, dehan Nia.

Eis Girileiru ne’e optimista, Konsellu Veteranu sira  sei nafatin iha vontade  hodi halo servisu, tanba ema hotu ne’ebé uluk halo funu  ho objetivu ba independénsia Timor nian,  maske partisipasaun la hanesan. GMN