Abitante merkadu Karantina konsidera KPK autór ba problema

Abitante ida  iha Aldeia Terra Santa konsidera membru Konsellu Polísiamentu Komunitária (KPK)  iha merkadu Karantina mak sai autór ba problema.

Rogerio Babo hato’o lia hirak ne’e liu husi diálogu komunitaria entre  komunidade merkadu Karantina no bairu Uma Mean Tersa (07/01/20), relasiona ho kazu  tentativa omisídiu  ne’ebé mak akontese iha fulan Dezembru  rezulta joven ida hetan  tá no membru F-FDTL ida hetan sona.

Tuir Rogerio Babo, kazu ne’ebé mak akontese  iha Karantina la’os problema juventude, maibé KPK nia oan sira.

“Ha’u hakarak  informa  KPK iha Karantina  hala’o servisu balun lalos,  tanba KPK sira mak problema nain, la’os ami juventude, KPK nia oan sira mak dala ruma problema, dala ruma KPK ho KPK mós problema hela”,esplika Habitante Rogerio Babo, iha merkadu Karantina.

Nia dehan,  problema sira akontese iha bairu, KPK ténki identifika didiak sé mak  involve  no sé mak la involve, la’os problema KPK  la haree depois mai hatudu ba autoridade seguransa no defeza hodi hodi baku arbiru de’it.

“Alin  horbainhira tá  forsa  ne’e ha’u nunka   hare’e  KPK ida iha fatin akontesimentu  irmão Ameu de’it mak iha fatin refere, maibé la tau kamija KPK. Agora Polísia ho forsa tun mai atu atua problema sira KPK  hatudu arbiru de’it  nune’e autoridade seguransa no defeza baku arbiru de’it, depois inan aman no labarik sira mós kona gás lakremugéniu, ne’e KPK nia hahalok, tanba sira la identifika lolos”,dehan Rogerio Babo.

Responde ba  preokupasaun ne’e Xefe KPK merkadu Karantina  Marcos de Jesus, konsidera informasaun ne’ebé mak hato’o husi Rogerio Babo lalos.

Tanba problema  ne’ebé mak akontese iha Karantina membru KPK  iha oin halo prevensaun, hafoin membru PNTL ho F-FDTL  to’o iha fatin akontesimentu hodi kaptura suspeitu  ne’ebé mak involve iha kazu tentativa omisídiu ne’e.

“Problema akontese ita subar malu  ida ne’e lalos,  kuandu problema grave ami informa ba  Polísia   to’o iha fatin akontesimentu  hodi halo prevensaun”,dehan  Marcos de Jesus.avi