GPR fó apoiu nesesidade báziku ba vítima inundasaun iha Suku Manleuana

Gabinete Prezidensia Repúblika (GPR), fó apoiu nesesidade báziku,  ba vítima inundasaun Aldeia tolu, iha Suku Manleuana mak hanesan, Aldeia Lau-Loro, Mauk no Lesibutak, Postu Administrativu Dom. Aleixu, Munisípiu Díli.

“Knaar hodi ajuda vítima sira lolos ne’e mak Governu, Prezidensia Repúblika ajuda iha situasaun ne’ebé mak urjente no emerjente ruma mak ajuda para tahan hodi hein Governu nia ajuda, mas apropriadu  ba ita-nia vítima sira, bainhira susar hanesan ne’e, Prezidente haruka kedan instrusaun tu’un ba Xefe Kaza Sivíl para kordena ho ministériu relevante sira para ajuda lalais vítima sira”, informa Diretur Jeral Palásiu Prezidensial, Domingos Romaldo Santos Carmo Amaral, Iha Sede Suku Manleuana Tersa (07/01/2020) .

Nia hatutan, apoiu ne’ebé GPR  oferese ne’e hanesan,  fós, balde, mina no seluk tan,   simu husi Aldeia tolu de’it,  husi Suku Manleuana, tanba identifikadu hanesan Aldeia ne’ebé afetadu tebes  ba iha indundasaun  ne’ebé akontese foin lalais ne’e.

Tanba tuir Domingos Romaldo Santos Carmo  Amaral katak,  apoiu nesesidade báziku sira ne’e,  nu’udar apoiu emerjénsia husi Prezidensia Republika,  oinsa atu ajuda vítima sira iha situasaun difisil ne’ebé vítima sira hasoru.

“Ajuda vítima sira la’os foin primeira vez, molok ami ajuda iha ne’e, ami fó tiha ajuda ba vítima sira hetan estragus iha Ermera , Liquica, Aileu, Baukau no Ainaro, buat ne’ebé ami fó tuir ami-nia kapasidade, maibé mós la haluha atu hatete de’it, ajuda sira ne’e ami kordena ho kamara komersiu no industria”, fundamenta Diretur Jeral  ne’e.

Alende ne’e, Xefe Suku Maneluana, Jacob Tilman Soares hateten,  bazea ba pedidu husi Autoridade Lokal katak, Aldeia tolu ne’e deit mak afetadu tebes ba inundasaun, no presiza tebes ajuda husi parte relevante sira.

 “Tanba Aldeia tolu ne’e, balun  grave balun normal,  grave tanba vítima sira-nia uma la aproveita, no uma laran fatuk mak nakonu bikan, sana, kama, iha barak mak simu ona iha loron hirak liu ba, ajuda ona husi Ministériu Solidariedade Sosial,  husi Sekretáriu Estadu Meiu Ambiente , sira dadaun ne’e mak vítima  sira ne’ebé labele halo buat ruma , tanba  sasán uma laran ba hotu kedan”, salienta Xefi Suku.

Vítima Agosto Freitas da Costa mós haktuir,  maske sira simu ona ajuda báziku husi GPR ,  maibé nia nafatin ezije ba governu atu tau  matan emerjénsia  ba bareira iha Aldeia Lau-Loro.

“Atu  ajuda ne’e sufisiente ou la’e, ha’u labele ko’alia,  ha’u so ezije mak ida ne’e, tau matan  ba bareira ne’ebé  mak monu dadauk ne’e, ho  emerjénsia  no tempu badak nia laran, kuandu hein to’o fulan rua, bareira ne’e afeta bo’ot ba ami,  no udan kuandu mai taan uma sira rahun hotu , emerjénsia ba nesesidade báziku ami fó obrigadu barak, tanba bele ajuda ona ami ba loron ida no rua nian”, Suliña Agosto.oly