Ramos Horta: Fundadór nasaun TL mak Xavier ho Nicolau Lobato

Eis Ministru Negósiu Estranjeiru iha primeiru Governu konstitusional 1975, José Ramos Horta, hatete, fundadór nasaun no Estadu Timor-Leste (TL) mak Francisco Xavier do Amaral ho Nicolau Lobato, la’os ema hot-hotu lae.

“Ha’u lakohi buat ida be fundadór ne’e, fundadór normalmente ida ka rua, la’os nain lima ka nain sanulu mak fundadór. Fundadór mak ema nain rua, Francisco Xavier do Amaral ho Nicolau Lobato, hanesan iha Indonézia (fundadór nasaun no Estadu) mak Soekarno no Hatta. Maibe ida ne’ebé restauradór mak Xanana Gusmão, portanto ami sel-seluk lae,”konta José Ramos Horta iha grande entrevista ne’ebé hala’o husi GMN TV iha Bebora Díli, Segunda (6/1/2020) hodi haloos istória Timor-Leste nian.

Ramos Horta hatete lia hirak ne’e bainhira nia rona nia kolega Sekretáriu Jeral partidu FRETILIN, Marí Alkatiri, iha eventu boboot sira Estadu nian sempre deklara ba públiku katak, nia mak fundadór nasaun no Estadu Timor-Leste.

Eis Prezidente Repúblika, José Ramos Horta ne’e mos afirma, se hakarak Timor-Leste ba oin, tenke preokupadu mos ho Estadu ida ne’e.

Francisco Xavier do Amaral iha tinan 1975 hafoin proklamasaun independensia República Democrática de Timor-Leste, hanesan Prezidente Repúblika no mos proklamadór independensia Timor-Leste, no Nicolau Lobato hanesan Primeiru Ministru iha tempu ne’eba.

Antes ne’e, Sekretáriu Jeral partidu FRETILIN, Marí Alkatiri, sempre halo deklarasaun ba públiku katak, nia mos fundadór nasaun no Estadu Timor-Leste.GMN