SEPC-emprezáriu Xineza sira sei fó apoiu ba vítima inundasaun Tasi-tolu

Sekretariadu  Estadu Protesaun Civíl (SEPC), koordena ona ho Timor-Plaza no Emprezáriu Xineza sira iha Timor-Leste, atu fó apoiu aihan ba vítima inundasaun atus rua resin iha Tasi-tolu.

Sekretáriu  Estadu Protesaun Civíl, Alexandrino Xavier de Araujo hateten, dadaun ne’e Diresaun nasional dezastre no Bombeirus harii ona ekipa konjunta ida hodi nune’e, banhira ajensia ka kompañia ruma atu fó apoiu aihan ruma ba vítima inundasaun sira, bele kontaktu ho ekipa konjunta ne’e.

“Vítima ba inundasaun iha Aldea karantina no Doze de Outubru hamutuk 204, husi númeru ne’e família 24 mak evakua ona ba fatin GOI Bombeirus Comoro no Konventu Padre Salezianu Dom-Bosco nian, hodi hela provizóriu, tanba ne’e atu responde apoiu emerjensia ruma ba vítima sira ne’e, parte Diresaun Nasional Dezastre no Bombeirus harii ona ekipa konjuntu ida, hodi nune’e banhira ajensia ka kompañia ruma ne’ebé hakarak fó apoiu ba vítima sira ne’e, bele liu husi ekipa ne’e”, hateten  Alexandrino Xavier de Araújo ba Jornalista iha nia kna’ar fatin Kaikoli Díli, Sesta (24/01).

Alexandrino hatutan, parte Sekretariadu  Estadu Protesaun Civíl mós, halo ona enkontru ho ajensia sira iha Timor-Leste hodi halo preparasaun atu responde ba situasaun emerjensia ruma ne’ebé mosu iha Timor-Leste, ne’ebé dadaun ne’e diresaun nasionál dezastre mós foti hela dadus ba vítima sira iha Becora nian, nune’e iha tempu badak bele hetan apoiu ruma husi governu.

Total dadus vítima iha  Timor-Laran tomak ne’ebé afetadu husi dezastre naturais hamutuk rihun hitu, no husi númeru ne’e Diresaun Nasional Dezastre fó ona apoiu Material konstrusaun hamutuk rihun tolu resin.aba