Tinan 2019 PN lakon reprezentante povu na’in rua

Membru Parlamentu Nasional (PN) ne’ebé mate iha tinan 2019 mak Gilman Ascenção Exposto dos Santos no saudoza Albina Marçal “Bia Shana Falu”.

Iha uma fukun PN V lejislatura matebian Gilman nu’udar Xefe bankada husi bankada UDT/Frente Mundansa (FM) no matebian hakotu ís iha loron 25, fulan 11, tinan 2019, iha tuku 07:48, iha Hospital Nacional Guido Valadares (HNGV), tanba sofre moras atake kardiáku.

Hafoin PN presta omenájen ho votus unanimidade, kontinua ba halo’ot iha semitériu públiku Becusse-Díli.

Nune’e mós iha tinan 2019 nia rohan, iha loron 29, fulan Dezembru, fila-fali hafalun PN ho lutu metan, tanba lakon tan deputada veterana, ezijente no eroína ida.

Matebian Albina Marçal “Bia Shana Falu” , hakotu ís iha loron 29, fulan 12, tinan 2019, iha Hospital Nacional Guido Valadares (HNGV), tanba sofre moras kánkru pulmaun.

Matebian nu’udar deputada husi bankada CNRT dezde PN III  lejislatura, maibé iha V lejislatura nia (matebian-red) mós hetan fiar lidera komisaun ou sai Prezidente komisaun G PN.

Alénde hanesan deputada, matebian nu’udar veterana ida, ne’ebé fó ninia dedikasaun tomak ba luta libertasaun nasionál.

Entretantu matebian hetan última omenájen husi PN V lejislatura, iha loron 2, fulan 1, tinan 2020. Hafoin ne’e família ho Estadu kontinua halo’ot matebian nia-isin iha Jardim dos Herois da Pátria Metinaro. ety