Família hetan ona Justino Lopes nia mate-isin ne’ebé Lafaek “lori lakon”

Família husi Justino Lopes (matebian) ne’ebé Lafaek lori lakon ba iha tasi klean parte Tasi-Tolu, iha Domingu (9/2/2020), hetan ona ninia mate-isin.

Hafoin hetan família sira lori mate-isin ba hala’o autopsia iha Hospital Nacional Guido Valadares.

Antes ne’e Matebian Justino Lopes deskonfia lafaek lori lakon bainhira ho ninia kolega Antoninho da Costa luku tasi iha área Tasi Tolu-Díli, iha loron 6, fulan Fevereiru ne’e, mais ou menus tuku 08:30 oras Timor-Leste.

“Ami luku husi BTN 2 (bairru balun iha Tasi Tolu-red) mai akontese iha fatin ne’e, ami na’in rua luku, ha’u husi ninin no matebian iha klaran, ha’u haree nia ho lafaek riba malu iha tasi-laran, ha’u haree de’it labele halo buat ida, ha’u hala’i sai husu ajuda katuas iha sorin no bolu sira husi Atauro ho ró, maibé tarde ona, lafaek dada nia rama ba tasi laran”, Kolega husi matebian, Antoninho da Costa ba GMN iha Tasi Tolu-Comoro, Sábadu (08-02-2020).

Matebian Justino Lopes (32), husi munisípiu Díli, postu administrativu Atauro, suku Maquili, husik hela ninia fen no oan na’in tolu, kompostu husi feto ida no mane rua.ety