Governu aprova rezolusaun reativa atividade GAM

Governu liu husi Konsellu Ministru (KM), Kuarta (19/02/2020), aprova proposta rezolusaun reativa atividade, Grupu Arte Marsiál (GAM).

Proposta rezolusaun Governu reativa atividade Grupu Arte Marsiál (GAM), ne’e aprezenta husi, Primeiru Ministru, Taur Matan Ruak, no hetan aprovasaun iha Konsellu Ministru (KM).

Lia hirak ne’e hato’o husi, Ministru Reforma Lejislativa no Asuntu Parlamentares, Fidelis Leite Mangalhães, ba Jornalista sira iha Palásiu Governu, Kuarta (19/02/2020).

“Konsellu Ministru diskuti asuntu importante tebes, tamba governu halo rezolusaun kona-ba arte marsiais, ne’ebé aprezenta husi Xefi Governu hodi revoga rezolusaun Governu númeru 16/2013 loron 10 fulan Jullu, ne’ebé koalia kona-ba bandu grupu arte marsiais”, afirma, Ministru Reforma Lejislativa no Asuntu Parlamentares, Fidelis Leite Mangalhães.

Fidelis hatutan katak, Governu mós husu ba Polísia Nasional Timor Leste (PNTL), atu intensifika asaun hotu hodi kombate krimi ne’ebé relasiona ho ilísita ba Grupu Arte Marsiais no Arte Ritual sira.

“Rezolusaun ne’e, fo dalan ba GAM sira atu pratika, maibé presiza kumpri lei númeru 5/2017, implementa ho vigor no rigor lei ne’e, iha rezolusaun antes ne’e bandu GAM atu labele pratika, maibé, rezolusaun ida ne’e hateten, bele pratika maibé, tenki tuir lolos lei ne’ebé iha ona, tamba lei ne’e defini klaru kona-ba armas brankas no pratika GAM”, esplika, Fidelis Mangalhães.

Alende ne’e, lei númeru 5/2017 koalia kona-ba pratika arte marsiais sira nian no ritual, nomos arma branka, ne’ebé defini iha, aritigu 2 númeru 1, ne’ebé koalia kona-ba katana, espada no seluk tan.

Antes ne’e, iha fulan Jullu, tinan 2013, Governu hasai rezolusaun hodi taka atividade Grupu Arte Marsiál (GAM), tanba, GAM iha momentu ne’eba sempre halo krime no halo mos povu sira moris iha pániku nia laran.

Nune’e mos, Governu aprova mos lei númeru 5/2017 ne’ebé koalia kona-ba prátika arte marsiais sira nian no ritual, ne’ebé liga liu ba Arma Branka, katak, bandu GAM sira lori sasan kroat hodi ameasa ema seluk nia vida moris.Cin