Komunidade Bairo Pité preokupa ho servisu Saneamentu kee estrada públiku

Komunidade sira ne’ebé hela iha Suku Bairo Pité, preokupa ho servisu Saneamentu nian,  tanba kee arbiru estrada públiku iha diresaun Bairo Pité, hodi fó impaktu ba movimentu transporte no hamosu dezastre iha área refere.

“Kompañia balun servisu hamutuk ho servisu saneamentu, kee tiha estrada iha diresaun refere, maibé to’o agora husik hela hodi fó impaktu ba movimentu transporte, tanba fatin ne’e ema barak mak hetan ona dezastre monu dala nen ona hodi rezulta liman ain tohar, tanba kee tiha estrada ne’e la tau fali alkatraun, maibé taka deit ho rai, nune’e kuak iha nafatin deit. Ne’ebé husu ba kompañia ne’ebé kee ona estrada ne’e atu mai taka  fali alkatraun, nune’e labele fó risku ba ema nia vida”, hateten Tadeo Manuel Patrício ba GMN iha Bairo Pité Díli Kinta (20/02/2020).

Tadeo Manuel  konsidera  kompañia ne’e kiak ida no laiha responsabilidade, tanba kee tiha estrada  atu tau kanu hodi dada bee ba komunidade, maibé to’o agora komunidade sira hein bee lamai nafatin  .

“To’o agora kompañia ne’e la mosu mai atu haree dala ruma kompañia ne’e maukiak ida karik, sekarik kompañia ne’e mautezu ida laiha osan karik, di’ak liu ba uma toba tia deit, labele estraga fali alkatraun ne’ebé iha tiha ona, tanba mai kee hela husik rai kuak ne’e halo ema seluk mak monu fali ne’e ladun di’ak, kuak ne’e karik husik hela bei-beik, ema sei mate mós barak iha fatin ne’e, tanba dala ruma ema ho motór halai lansadu la haree kuak ne’e bele monu mate”, lamenta Teo.

Iha parte seluk, tuir observasaun Jornalista GMN nota katak, Governu fó fiar ba kampañia Montana Di’ak hodi kee sai alkatraun ne’ebé laiha kualidade hodi  tau fali alkatraun foun iha área Kolmera.aba