Kareta  mikrolete  diresaun Komoro-Bidau  hamutuk lima, obrigadu vídru tenke rahun,  tanba  deskonfia tuda  husi estudante  balun iha 10 Dezembru. Iha akontesimentu ne’e rezulta estudante na’in rua iha kareta-laran kanek.

Kazu  ne’e akontese Sesta (14/02/20) mais ou menus tuku 12 oras meudia.

Kareta mikrolete sira  ne’ebé mak rahun hanesan  Anarua ho sapa matrikula 34-606, Brilha  Oriente  ho sapa matrikula 36-606, Fimbamor  ho sapa matrikula 32-056, Nenci  ho sapa matrikula  34-242 Timor-Leste, kareta ida seidauk iha sapa matriku, tanba tula hela pasajeirus nain  ida kanek ba hala’o tratamentu.

Kareta sira ne’e Polísia asegura ona  iha Eskuadra Dom Aleixo hodi  submete ba  prosesu investigasaun.

Motorista  mikrolete  Saturnino de Andrade,  lamenta aktu estudante sira nian,  ne’ebé mak tuda rahun kareta  sira ne’e. Tanba ne’e nia husu  Polísia  buka identifika estudante ne’ebé mak involve iha kazu refere hodi prosesu tuir dalan legal.

“Ami tula  ba  pasajeirus  inklui estudante sira 10 Dezembru balun  iha  kareta-laran,depois to’o iha area 10 Dezembru estudante sira tuun husi kareta, kebetulan estudante balun iha kareta-laran tau farda mutin, ne’ebé  estudante 10 Dezembru, hanoin katak,  estudante  sira tau farda mutin ne’e husi eskola Finantil, ne’ebé sira dehan Finantil hatun tiha husi kareta, entaun estudante sira mós hatan ami la’os eskola Finantil, maibé ami eskola iha Eskola Sekundária númeru 4, sira la fiar,  sira tenta rasta tuun husi kareta, maibé aranka kareta, depois mak estudante  sira tuda kareta, sira tuda kareta ne’e fatuk hanesan udan”,esplika Motorista  mikrolete  Saturnino de Andrade, ba GMN Sesta (14/02/20) iha Eskuadra Dom Aleixo  munisípiu Díli.

Alende  ne’e, PNTL Eskuadra Dom Aleixo detein estudante nain rua, tanba deskonfia halo problema iha eskola  10 Dezembru.avi