Suku Manelobas “halerik” ba eletrisidade, estrada no bee moos

Komunidade sira iha Suku Manelobas , Postu Administrativu Maubisse Munisípiu Ainaru, sei kontinua “halerik” ba problema infraestrutura hanesan eletrisidade, estrada no bee moos, dezde ukun aan to’o ohin loron.

“Iha ami nia Suku estrada la tama, ahi laiha no bee moos seidauk iha”,lamenta komunidade Suku Manelobas , Aurora Salsina Lopes, ba JN-SEMANÁRIO, Kinta (06/02/2020) iha Munisípiu Aileu.

Aurora haktuir, hanesan povu kiik ne’ebé hela iha área rural sente triste, tanba susar tebes atu asesu ba eletrisidade, nune’e obriga sira tenke uza panel solar hodi fó naroman iha tempu kalan.

“Ami atu lori produtu ba merkadu ne’e susar tanba laiha transporte no estrada ladiak, entaun ami transporta produtu ba merkadu ho kuda no dalaruma kuda laiha ami tutur deit”, Aurora haktuir.

Nune’e mós Julio Mendonça informa, durante ne’e sira hasoru problema falta bee moos no estrada inklui eletrisidade, hodi implika sira atu asesu ba merkadu, bee uza ba nessesidade tenke hadau malu inklui kalan toba uza deit lilin.

“Ami husu ba governu hanesan ami nia inan-aman, atu tau matan mai ami povu kiik iha área rural, tanba problema ne’ebé ami enfrenta taka dalan ami nia oan atu eskola, liu-liu tempu kalan sira atu estuda ahi laiha no sira tenke lao do’ok hosi uma ba eskola”.

Hatan ba preokupasaun ne’e, Xefe Suku Manelobas , Domingos de Andrade, hatete, problema hirak ne’e hanesan autoridade lokál hato’o ona ba governu lokál no nasionál, maibé seidauk iha solusaun to’o agora.

“Ami halo ona rekomendasaun hodi haruka ba governu, maibé ita haree governu troka ba troka sira koalia deit maibé povu seidauk sente dezenvolvimentu, tanba proposta ne’ebé ami hatama ba governu la hatene ba tasi ou sira rai deit iha gaveta laran”,tenik nia.

Autoridade Lokál afirma, iha moto hakerek naroman ba ukun aan, maibé nakukun ba dezenvolvimentu, ida ne’e mak realidade ne’ebé povu sente iha área rural. Maske Timor ukun aan ba dala 18 ona maibé povu iha área rurál seidauk sente ukun-an.

Suku Manelobas  iha aldeia hanesan, Aldeia Ernaru, Hautei, Hautilo no Aldeia Kotomata, ho total uma kain hamutuk rihun ida hitu nulu resin ualu. Fel

Leave a Reply

Your email address will not be published. Required fields are marked *