Lere: F-FDTL kuaze batallaun ida limpeza iha Díli

Xefe Estadu Maiór Jenerál FALINTIL-Forsa Defeza Timor-Leste (F-FDTL) Majór Jenerál Lere Anan Timur, mobiliza  membru F-FDTL kuaze batallaun ida halo limpeza  ba komunidade afetadu inundasaun inklui  eskola no  fatin ospitál sira.

Udan boot  iha Sesta (13/03/20) provoka mota  tuun hodi sobu komunidade sira nia uma  iha Taibessi, Bekora, My Friend,   no Bidau no bairu sira seluk tan.

Iha inundasaun ne’e halo komunidade sira labele toba iha  uma tanba,  bee tama uma-laran

No Eskola Portuges Balide no eskola públiku  balun iha Bekora  hetan afetadu mós husi inundasaun.

Tanba  ne’e iha Segunda (16/03/20) Lere Anan Timur, mobiliza  membru sira hodi halo limpeza ba iha komunidade sira nia uma afetadu husi inundasaun  no fatin eskola balun  no tuir planu sei hala’o  limpeja iha ospitál balun

“Ha’u mobiliza  forsa tomak  mai iha ne’e, menus Komponente Terrestre mak la mai tanba dook husi Baucau, maibé husi Metinaro too Kuartel Jenerál , ha’u loron hirak ne’e, ha’u sei suspende sira nia servisu hotu-hotu,  hela de’it seguransa iha baze ho servisu  ne’ebé mak urjenti liu”,esplika Xefe Estadu Maiór Jenerál FALINTIL –Forsa Defeza Timor-Leste (F-FDTL) Majór Jenerál Lere Anan, ba jornalista sira Segunda (16/03/20), iha  My Friend, Balide, Díli.

Lere dehan,  kuaze batallaun ida  mak halo limpeza prioridade primeiru mak eskola sira ne’e, segundu periodade mak ospitál, depois ba fali komunidade  sira afetadu liu.

“Membru F-FDTL  sira halo servisu to’o Díli ne’e mós  mak foin ha’u haruka para”,dehan Lere.

Maske halo limpeza, maibé Jenerál Lere dehan, F-FDTL laiha meus  ne’ebé mak sufisente  hodi tula foer  ne’ebé mak halibur husi forsa armada sira, maibé ne’e governu mak sei haree  ida ne’e.

 “Maibé ohin ha’u dehan ona komandante lojístika atu aluga kareta hat ka lima  hodi mai ajuda tula foer sira ne’e”

Tanba  ne’e, Lere dehan, sei aluga kareta balun hodi tula foer sira ne’e.

 Husi akontesimentu udan boot ne’e rezulta joven ida mate, tanba mota  Taibessi lori, no ema na’in hat hetan kanek.

Alende ne’e komunidade uma kain   1105 mak hetan afetadu, no ema  hamutuk 6700  iha Suku sira  iha  Díli laran.avi