MOP sei esforsu rezolve inundasaun iha sidade Díli

Udan bo’ot ne’ebé akontese, Sesta (13/03/2020) lori sofrimentu bo’ot ba komunidade sira iha díli laran, tanba rezulta ema balun mate no balun kanek inklui mos sasan sira.

Mosu udan bo’ot ne’e, kuaze oras rua nia laran, hodi hamosu inundasaun iha sidade díli, no lori sofrimentu ba komunidade sira, tanba ho udan boot ne’e, hamate ema na’in rua, balun kanek, no estraga komunidade sira nia uma inklui estraga sasan.

Relasiona ho situasaun ne’e, mesmu Estadu Timor-Leste, la’o deit ho orsamentu rejime duodesimal, maibé ministériu obras públika (MOP), sei esforsu hodi halo jestaun ba situasaun ne’e, nune’e bele rezolve situasaun aktual ho lalais, tanba akontesimentu ne’e, estraga mós sidade díli nia furak.

“Ita hotu hatene katak iha orsamentu la’o ho duodesimal, i nune’e mós ba iha planu longu prazu ni’an ita presiza haree, tanba ita haree katak situasaun aktual ita nia sidade díli sidade ida ne’ebé dezoraganizadu ita nia komunidade sira iha foho leten mota ibun nune’e mós ita nia dreinajen ne’ebé ke la’o desorganizadu tanba ne’e mak esforsu husi parte ministériu obras públika ita presiza esforsu másimu tebe-tebes nune’e bele rezolve situasaun aktual i nune’e mós ba iha longu prazu ni’an tanba ne’e mak esforsu, área taibesi li-liu ba mota maloa ni’an ne’e mak ita esforsu para bele ba iha terenu haree no halo jestaun iha ekipamentu para bele solusiona ita nia problema inundasaun ne’ebé mak akontese iha ita nia sidade díli ne’e”, dehan, Vise Ministru Obras Públika, Nicolau Lino Freitas ba Jornalista sira, hafoin partisipa konferensia nasionál partidu FERETELIN ni’an, iha Salaun Katedral,Sabadu (14/03/2020).

Tuir observasaun, impaktu husi udan bo’ot ne’e, be’e tama uma komunidade sira ni’an iha dili laran, inklui edifisiu balun governu ni’an, hafoin udan bo’ot, iha sabadu ne’e mosu rai rahun makas hodi halakon sidade díli nia furak, tanba impaktu husi udan bo’ot ne’e.Ina