Satan netik COVID-19, Lia na´in Metinaro halo rituál

Lia na´in sira husi Postu Administrativu Metinaro munisípiu Díli, Domingu (29/03/20), hala´o ritual hodi  satan netik COVID-19, labele kona Timor-oan sira.

Lia na´in husi Mota-Ulun/ Mota-Ain no uma lisan Lionar hamutuk ho komunidade inklui  autoridade lokál postu administrátivu Metinaro   hala’o ritual  hodi la’o ain husi Benunuk tama  área Noan tasi ibun,   ho hamulak tuir estrada no oho animál  bibi  hodi hasa’e sakrifísiu ba foho lulik sira no tasi atu satan netik coronavírus no tau ho osan mutin.

Lia na’in Adão Soares Samarai, esplika, sira halo rituál  ne’e ho inistisiativa hosi lia na’in sira no komunidade, hodi husu ba Maromak avo no beila sira, fatuk lulik, ai lulik, we lulik sira atu ajuda no fó matak malirin ba oan no bei oan sira hodi satan netik sira coronavirus labele tama mai Timor Leste.

“Ohin ami Suku Sabuli no Mantelolau  inklui Benunuk  hodi bolu lulik hodi futar matak no futar tilun, hosi Sabuli hodi bolu Lulik, Lua-Nari  hodi bolu futar matak  hitu dala rua, Benunuk mós bolu  Bermali korkeli dala rua, Mantelolau hodi bolu Kulu Kisa ho Kalau, Taboso Mau-Mali hodi hateke ba rai Manatutu, rai Santo António, Sãp Vicente  no Nosa Señora Aitara hodi  hamrik hamutuk ho kultura  hodi dudu moras ida ne´e sai”,esplika Lia na’in Adão Soares Samarai, ba   GMN Domingu (29/03/20), iha Noan área Tasi ibun Suku Sabuli, Metinaro.

Alénde ne’e Diretór Nasionál Património Kulturál Gil Oliveira konsidera seremonia ritual ne’e mós importante, tanba  lia na´in sira hakarak kontribui matenek tradisionál hodi prevene moras a´at ida ne’e labele kona Timor-oan sira.

“Ha´u lori Sekretáriu Estadu Kultura  nia naran aprésia, kuandu mosu ona pesti ida ne´e iha Xina, lia na´in sira husi tritóriu Timor-laran tomak  husi lorosae, tasi feto too tasi mane, komesa kedas husi Suku too  postu administrátivu too munisípiu  sira ida-idak inisiátiva sira nia a´an rasik  organiza malu hodi hala´o seremonia ida ne´e. Ita nia lia na´in sira mós hola parte hotu oinsá  sira kontribui sira nia matenek tradisionál hodi prevene moras a´at ida ne´e labele estraga sidadaun iha Timor“,dehan Gil Oliveira.

iha fatin hanesan Administradór Postu Administrativu Metinaro esplika seremonia rituál ne’e tuir loloos, partisipa husi lia na’in uma lisan lima nian deit, maibé komunidade mak entusiaismu hakarak partisipa hodi hetan matak  malirin.

“Ita la fó avizu só  ita lori de´it kada uma fukun sira ne´e  katuas lia na´in sira iha ema na´in lima-lima, katuas sira kesi hela lensu mean iha ne´e,  ita nia komunidade sira só partisipa de´it. Depois sira tuir tiha seremonia ritual ne´e ami fó avizu  orsida  ida-idak tuur hakmatek  iha ida-idak nia uma atu nune´e moras ne´e labele da´et ba ema seluk“,dehan  Fausto Soares Dias

Seremonia ritual ne’e hala’o, hetan seguransa másimu husi membru Polísia Nasionál Timor-Leste (PNTL) no  FALINTIL Forsa Defeza Timor-Leste (F-FDTL).avi

Leave a Reply

Your email address will not be published. Required fields are marked *