Veteranu sira iha Ossu kuda ai-oan hodi minimiza dezastre naturál

Veteranu sira husi Postu Administrativu Ossu Kuda ai-oan  hodi minimiza dezastre naturál iha Postu Administrativu refere.

Xefe Komisaun Organizadora, Cândido Hendriques da Silva, informa, sira hili fatin ne’e atu kuda ai-oan, tanba nu’udar fatin istóriku ne’ebé presiza proteje hodi ema labele estraga fatin refere.

“Ai-oan rihun 1 ne’e ami hatama proposta ba parte Ministériu Agrikultura Munisipiu Vique-que nian, hodi fasilita atividade ne’e,  ami kuda ne’e hamutuk atus hat resin, sei hela atus 6, ne’eduni ami ho autoridade lokal no komunidade sira sei kontinua organiza malu atu kuda ai oan rihun 1 ne’e to’o remata iha Suku Osurua, nune’e ita-nia rai molik sira ne’e ita haree sai fali matak, hodi fó matak malirin ba ita ema moris”, hateten Xefe Komisaun Cândido Hendriques da Silva ba GMN iha Postu Administrativu Ossu,  Munisípiu Viqueque, Sábadu (14/03).

Cândido informa, Atividade re-florestasaun ne’e, atu garante ambiente ne’ebé furak no saudável, ba jerasaun foun sira iha tempu ohin loron  no futuru.

“Atividade kuda ai-oan ne’e, atu kuida povu sira husi dezastre naturais, inklui kontribui mós ba dezenvolvimentu ekonomia saudavel, tanba tempu okupasaun indonézia, ita-nia komunidade no bapa sira mós tesi hotu ai iha estrada ibun, nune’e laiha mahon di’ak ida ba ita-nia rai hodi estraga ambiente.

Vise Xefe Estadu, Brigadeiru Jeneral Falur Rate Laek, hateten, antes hala’o atividade kuda ai-oan ne’e, presiza halo uluk planu di’ak, nune’e ba futuru  bele iha manutensaun.

Xefe Suku Osurua, Eduardo de Araújo Freitas, promete sei organiza Autoridade Lokal,  veteranus no komunidade atu estabelese regulamentu hodi proteje ambiente.

Atividade kuda-aioan ne’e, hetan kontribuisaun orsamentu husi Autoridade lokal, veteranus, Australiano sira,  inklui komunidade Ossu hamutuk rihun sanulu.

Suku Osurua iha Aldeia Sia, ho total populasaun hamutuk rihun rua resin. Enkuantu total  Suku iha Potu Administrativu Ossu hamutuk 10.aba

Leave a Reply

Your email address will not be published. Required fields are marked *