Xanana apela ba komunidade labele pániku ho COVID-19

Líder Nasionál, Kay Rala Xanana Gusmão apelu ba komunidade sira la bele pániku ho coronavirus (COVID-19), maibé tenke tuir prosesu ne’ebé husi parte saúde fó sai ona ba públiku.

“Komunidade sira labele pániku ho COVID-19, maibé karik imi balun kakorok katar no moras, sente ba inus been no isin-manas tenke hadook-an husi família, ba konsulta iha sentru saúde sira, buat ne’e ita bele prepara ba ita, susar rai barak mai husi liur agora ema mate dau-daun, nune’e ita hotu tenke kuidadu”, Líder Nasionál ne’e liu husi konferensia imprensa iha sede nasionál CNRT, Bairro dos Grilhos Díli, Tersa (24-03-2020).

Xanana subliña mós katak, karik sidadaun ruma sente iha sintoma ba  COVID-19, tenke hadook-an husi família no ba konsulta iha sentru saúde ne’ebé besik, nune’e evita labele da’et ba ema seluk.

Entretantu, iha Segunda semana ne’e, Kay Rala Xanana Gusmão  akompañia ho ekipa Ministériu Saúde (MS) rega ai-moruk antiseptíka Desinfektan ba áreadores aeroportu internasionál Nicolau Lobato, Comoro-Díli.

Tuir dadus mundiál ba loron 24, fulan ne’e, totál ema ne’ebé infetadu COVID-19 hamutuk 384,527, husi númeru ne’e mate hamutuk 16,591 no ema hirak ne’ebé konsege rekopera husi COVID-19 hamutuk 102,536. ety