JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

Doutór Murphy hakotu Iis, tanba atake kardíaku  PN sei fó votu pezar

Doutór Murphy hakotu Iis, tanba atake kardíaku  PN sei fó votu pezar

Jestór Klínika Bairo Píte, Inácio dos Santos, hateten, antes ne’e matebian doutór Daniel Murphy laiha sintoma ba moras ruma, maibé iha Tersa (14/4) kalan mais ou menus tuku 08:15 oras Timor-Leste, molok hakotu iis matebian haruka nia oan feto haki’ak atu hanehan ninia hirus matan parte karuk, entaun ida ne’e justifika katak, iha atake kardíaku.

“Iha Tersa Feira dadersan liu husi via telefone, doutór Daniel husu atu ami buka medíku ida hodi subtitui nia fatin, atu fó tratamentu ba pasiente sira, tanba nia parte sente kolen no presiza deskansa iha uma. Iha Tersa Feira dadersan matebian husu atu deskansa, tanba kolen no iha kalan mais ou menus tuku 08:15 oras Timor-Leste, ami simu telefone husi alin feto ida ne’ebé hela ho matebian durante ne’e katak, matebian toba, maibé la bo’ok-an, entaun ami ho ekipa médiku balun ba kedas iha matebian nia rezidénsia, maibé to’o iha ne’ebá la konsege salva, tanba matebian hakotu tiha ona iis”, Jestór klínika Bairo Píte ne’e ba jornalista sira iha ninia kna’ar fatin, Kuarta (15-04-2020).

Inácio informa mós katak, antes ne’e matebian hameno ba sira katak karik akontese buat ruma, klínika Bairo Píte tenke halo nafatin antendimentu ba pasiente sira.

“Doutór nia lia menon ne’ebé nia sempre koalia katak, atu akontese situasaun saída de’it, atividade iha klínika kontinua la’o hodi serve ema ki’ak no lia-menon ida mak molok nia mate nia hameno hela dehan, nia mate isin tenke hakoi iha Timor, iha klínika rasik no lakohi atu nia mate isin lori ba Amerika. Matebian halo atendimentu ikus ba pasiente sira iha loron Segunda Feira dader to’o lokraik, fó tratamentu ba pasiente aman ho oan”, tenik Jestór klínika Bairo Píte ne’e.

Lee hotu :   PROGRAMA GOVERNU FO ESPERANSA BA POVU • DOM VIRGILIO KONDENA AKTU INSULTUS IHA MEDSOS

Nia subliña, espíritu ne’ebé sira foti husi Doutór Daniel mak servisu la hatene kolen katak, sei serve to’o hakotu peregrinasaun moris iha mundu.

“Ami profesionál saúde barak mak sai husi Doutór Daniel nia liman, la’ós de’it ema médiku, maibé ema balun ne’ebé la’ós médiku Timor-Oan, matebian haruka ba eskola iha Amérika, Austrália no Korea, entaun Doutór Daniel la’ós de’it ema médiku, maibé nia hanesan mós ema edukadór. Espíritu ne’ebé foti hosi matebian mak la hatene kolen tuir moto katak, sei servi to’o ís ikus, entaun maioria profesionál saúde sira ne’ebé durante ne’e servisu ho matebian no ami hotu servisu tuir moto ne’ebé iha, hodi serve ho fuan no la halo diskriminasaun, tanba tuir prinsípiu husi nia katak, médiku nia vida la importante liu pasiente nia vida. Hau bele dehan iha Timor, doutór Daniel laiha ona, maibé nia hakiak ona feto ida ne’ebé durante ne’e hela ho nia no antes ne’e hakiak mós mane hosi munisípiu Aileu, ne’ebé nia fó ba eskola iha Amérika no kontinua masteradu iha Austrália, la’ós ba sira-na’in rua (2) de’it, maibé ami sira ne’e hotu, tanba sai husi ninia liman laran to’o nia hakotu iis”, hateten Inácio.

Entretantu liga ho situasaun Estadu Emerjénsia (EE) ne’e, klínika Bairo Píte halo’ot mate-isin tuir kostume Timor ni’an, maibé sei halo’ot ho serimónia simples no sei halo selebrasaun bainhira kompleta loron 40.

  • PN sei fó votu pezar

Prezidente Parlamentu Nasionál (PN), Arão Noe, hateten, PN sei fó votu pezar ba matebian doutor Daniel Murphy, tanba fó ona ninia kontribuisaun ba Timor-Leste durante tinan 20 resin.

Lee hotu :   MTK: Primeiro Voo aviaun TransNusa seidauk klaru

“Timor-Leste lakon figura ne’ebé servisu maka’as dezde tempu Indonézia, nia (matebian-red) servisu iha parte saúde iha klínika Bairo Píte hodi halo atendimentu oi-oin, la hetan apoiu husi Governu, maibé buka rasik fundu husi liur. Ha’u hanoin nia merese atu hetan kondekorasaun husi Estadu no PN no sei fó votu pezar ba ninia kontribuisaun durante ne’e ba sidadaun Timor-Oan iha área saúde”, Xefe Órgaun Lejislativu ne’e ba jornalista sira iha PN, Kuarta (15-04-2020).

Maske iha fulan hirak liu ba klínika Bairo Píte enfrenta difikuldade finanseira, maibé klínika refere nafatin funsiona to’o matebian hakotu-iis.

Daniel Murphy moris iha loron 23, fulan Setembru, tinan 1944, iha Iowa, Estadus Unidus Ameríka (EUA) no mate ho idade 75, iha loron 14, fulan Abril, tinan 2020.

Entretantu klínika Bairo Píte koñesidu mós ho naran Klínika Lanud, ne’ebé hari’i husi matebian iha tinan 1995, hodi fó tratamentu gratuita ba pasiente sira. ety/fel

Add to Comments Here!!!!

error: Content is protected.
Secured By miniOrange
You might also like:
KM aprova dekretu governu kona-ba regras ezekusaun fundu COVID-19

Konsellu Ministru (KM), aprova projeitu Dekretu...

 KHUNTO koliga ho FRETILIN-PLP, José Agustinho konsidera rumoris

Sekretáriu Jerál (SekJer) partidu Kmanek Haburas...

Pasiente Covid-19 iha TL maioria feto  Kazu pozitivu aumenta ba ulu

Porta Voz Sentru integradu Jestaun Krize...

Close