SEFOPE husu traballadór iha Austrália no Korea labele pániku ho COVID-19

Sekretaria Estadu Formasaun Profisionál no Emprego (SEFOPE), husu ba traballadór  iha Austrália no Korea, inklui família hosi traballadór sira iha Timor-Leste, labele pániku ho COVID-19, tanba SEFOPE esforsa hela hodi haree kondisaun traballadór sira nian.

“Ligasaun ho COVID-19, ne’ebé akontese iha mundu nia kauza ema barak mate ona tanba virus refere, tanbe ne’e ami konsiente tebes ho moras ida ne’e, hodi husu ba traballadór no família traballadór sira atu labele pániku, tanba SEFOPE esforsu hela hodi tau matan ba kondisaun traballadór sira nian”,dehan Diretór Jerál SEFOPE, Paulo Alves, ba Jornalista sira Tersa (31/03/2020) iha Kaikoli.

Diretór Jerál SEFOPE haktuir, SEFOPE nafatin halo komunikasaun ho Adidu iha Korea inklui ekipa balun ne’ebé estabelese iha Austrália, hodi tau matan ba traballadór sira ne’ebé oras ne’e sei servisu iha Austrália no Korea.

“Tuir dadus ne’ebé iha, oras ne’e traballadór ne’ebé servisu iha Austrália hamutuk 1.130 ba programa sazonál ho kontratu fulan 6 no programa PLS iha traballadór hamutuk 71 ho durasaun kontratu tinan 1 to’o 3. Ami mantein komunikasaun ho traballadór sira liu hosi mídia sosiál, hodi fó esperansa ba traballadór sira atu kuidadu-an hodi prevene hosi covid-19”afirma Paulo Alves.

Paulo Alves, subliña SEFOPE hakarak relata deit katak, to’o oras ne’e traballadór sira iha Austrália no Korea, kondisaun diak hela no seidauk iha mak afeta covid-19 maske covid-19 tama ona iha fatin ne’ebé traballadór sira servisu ba.

“Ami nafatin apela traballadór sira atu kuidadu-an, hanesan bainhira laiha servisu labele lao sai no karik ba servisu tenke uza material maskra no luvas hodi proteje-an hosi covid-19”.Fel