JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

Dom Carlos: Ukun na’in sira labele fó ezemplu a’at ba foin sa’e

Dom Carlos: Ukun na’in sira labele fó ezemplu a’at ba foin sa’e

Bispu Dom Carlos Filepe Ximenes Belo husu líder Partidu Polítiku (ParPol) sira atu hatudu ezemplu di’ak ba jerasaun foun sira, la’os hatudu ezemplu a’at ba foin sa’e sira, tanba nasaun ne’e sira-nia liman.

“Ita husu deit ba ukun nain sira, atu bele karik mantein estabilidade, unidade, halo diálogo labele fo exemplo aat ba foin sa’e sira no liu-liu husu atu labele dada joven  sira hanesan sai fali grupos arte marsiais atu defende partido ida ne’e, defende partido ida ne’eba, hasoru ida ne’e. Hasoru ida ne’eba. No nia influensia nafatin iha Inglaterra iha Java iha Irlanda ne’eba grupos artemarsiais se nune’e nafatin. Ema balu dehan,  ne’e Amu ne’e boot balu mak iha kotuk.  Pois, tenki husu boot sira ne’e se?  Tamba sa mak halo nune’e? Ita em vez de mantein unidade, hakmatek iha ita nia jerasaun futura sira ninian tempo, ita kria fali divisaun iha foinsa’e sira nia leet. Ne’e duni exemplo diak tende ser mai husi ukun nain sira ema boot sira katuas no ferik sira. Atu nune’e joven sira bele  hetan exemplo diak  atu tuir”, hateten Dom Carlos Filipe Ximenes Belo, SDB.

Bispu Dom Carlos Filepe Ximenes Belo husu Bispu na’in tolu atu sai mediadór ba diálogu entre líder Partidu Polítiku (ParPol) sira. Maibe, prémiadu Nobel da Paz ne’e hateten nia sei la disponível atu fasilita diálogu hodi hakotu problema rai-laran se bainhira iha pedidu informal ruma husi autoridade no igreja.

“Hau la disponível, tamba iha ne’eba iha Amu Bispu nain tolu. Hau hadok aan tia ona, hau ses tia ona  ne’ebe hau labele tebe rai iha sira nain tolu nia oin. Ne’e duni dehan ba joven sira atu ba hasoru Amu Bispu nain tolu iha ne’eba  koalia didiak halo konferensia episcopal atu organiza. Hau hanoin tinan tinan iha pascoa joven ka kruz joven ne’e la’os atu reza deit, mas importante mos dialogo ne’e tem que mai husi sosiedade sivil, mai husi igreja no mai husi ukun nain  sira iha timor laran. Imi iha posibilidade atu halo diálogo naran katak ema ruma tenke fo passo uluk”, hateten Dom Carlos Filipe Ximenes Belo, SDB durante entrevista liu husi skype ba GMN, Kinta (14-2020).

Lee hotu :   PPN garante KNV sei solusiona problema veteranu nian

Premiadu Nobel da Paz ne’e mos hateten “sem duvida” nia disponível nafatin atu rona ema hotu nia hanoin simu surat ruma no  sujestaun sira. Atu kria diálogo ne’e, Amu Bispu husu sosiedade sivil no igreja maka  tenki pronto atu organiza.

“Imi rasik kria inisiativa reuniaun ho Amu Bispu nain tolu ho ukun nain sira para hare halo diálogo hala’o buat ne’e oinsa. Hau nia resposta,  sira nain tolu iha ne’eba sira iha autoridade hala’o diálogo lalika konvida hau ba. Ha husi kotuk reza deit, reza deit atu espirito santo atu tun husi lalehan(…) ba ita nia polítiku sira iha timor laran, sira ne’ebe líderes partidários fo inspirasaun ba sira atu sira bele deside didiak”, hateten.

Amu Bispu mos husu ba líder nasional sira atu halakon divisaun ne’ebe mak iha no haka’as aan atu resolve problema impasse político ne’e. Dom Carlos mos husu ba líder sira atu hatur lolos unidade nasional ne’e hakerek iha simbolo nasional la’os atu hatun malu. No la’os pronuncia deit liafuan unidade nasional ne’e husi ibun maibe tenki reflete didiak.

Tuir Premio Nobel da Paz ne’e atu ba ukun tenki iha luta partidária, maibe iha luta partidária ne’e tem que respeita adversários no apresenta programa ne’ebe válido no konsistente ba timor nia diak.Amu Bispu mos  líder sira atu forma sira nia aan sai ema ne’ebe kompetente ema ne’ebe iha empenho atu servisu diak ba Timor-Leste. Laureado ne’e konsidera unidade nasional ne’e mai husi ema ne’ebe haraik aan no  ema ne’ebe la’os haraik aan laiha unidade.

“Unidade iha momento ida ne’e liu husi krise hanesan buat hotu-hotu ne’eba maka mundo ninian iha altos e baixos iha tempu diak iha tempo aat. Uluk kuando luta hasoru Indonesia ne’e ita iha unidade maka’as tamba hamutuk hasoru inímigo ida deit. Agora ne’e ita livre ona independente ona hanoin unidade balu-balu hakarak mak hatun malu para konkuista poder konkuista kadeira hetan osan diak hetan naran. Tan ne’e tenki hanoin fali sa ida mak lia fuan unidade ne’e. Unidade liu-liu exije respeito diálogo, kolaborsaun no liu-liu haraik aan. Ne’e duni hau hanoin momento ida ne’e ita hare ba sei iha hela impasse polítiku orsamento jeral mos la aprova, la aprova iha maioria ka laiha maioria no fim ita nia povo mak sofre hela deit. Osan mos laiha, mina rai mos agora bidon ida folin tun los. Lahatene aban bai rua ne’e osan iha ka lae?”.

Lee hotu :   Padre Ruben Martines husu sarani jejun hodi hametin fiar iha família

Dom Carlos Filipe Ximenes Belo husu político sira atu labele usa joven sira sai hanesan instrumento político, maibe tenki fo atensaun ba edukasaun foin sa’e sira. Tuir Sacerdote ne’e mos konsidera iha nasaun barak joven sira maka sai hanesan dinamizador nasaun nian tamba eduksaun importante dunik ba foin sa’e sira. Tamba ne’e Dom Carlos husu ba político sira atu labele usa joven sira hanesan instrumento político hodi atinge interrese partidáriu.

Tuir Laureadu Nobel da Paz ne’e, atu ukun ne’e tenki ser iha alternancia do poder. Atu hetan ida ne’e, ne’e mai husi partido político sira.  Partido político sira ne’e mosu liu-liu atu atu tau interese nasional acima do interrese partidário. Tau importánsia ba bem comum,  povo nia diak, povo nia moris, povo nia interese, joven sira nia moris, joven sira nia interrese. Bispu timor oan ne’e mos konsidera Timor-Leste ne’e pertense ba jerasaun future. Tamba ne’e nia husu  Governo tenki tau matan ba foin sa’e sira tamba jerasaun tuan sira ne’ebe agora iha sei husik nasaun ne’e iha loron ida.

“Tamba sira(joven) mak aban bainrua hatutan fali eransa kultural, identitária, liberdade paz independénsia Timor-Leste nian. Ne’e duni joven sira okupa fatin ida ne’ebe mak importante liu  iha timor nia laran. Hau hanoin Governo iha atensaun boot ba sira nune’e mos igreja. Agora buat ne’ebe ita nia joven sira mak liu-liu eduksaun, iha aspeto hotu-hotu. Edukasaun iha kultura iha siensia iha teknolojia. Buat sira ne’e hotu para sira forma sira nia aan para depois ukun fali Timor-Leste bainhira katuas sira mate ona. Ne’e duni importante maka ita iha nafatin konfiansa ba ita nia foin sa’e sira hadomi nafatin sira no fo oportunidade para sira forma sira nia aan”, hateten.

Lee hotu :   Ema deskoñesidu ta’a joven ida iha Maloa

Maibe Bispu Belo  mos husu ba Joven sira tenki preserva sira nia saúde, labele hemu tua arbiru deit, labele joga arbiru deit labele ba kore metan to’o dadersan to’o tuku ualu tuku sira mak foin  hader. Ne’e estraga sira nia saúde, mental no fisóko. Tuir  selesiano ne’e atu ukun rai ema tenki ser polítiku tenki governante tenki ser funsionário ne’ebe integro iha saúde, mental, spiritual no fisika.  Prémio Nobel da Paz ne’e husu joven sira atu iha inisiativa rasik hodi estuda konaba situasaun  nasaun  nian hanesan, ekonomia, polítika no partisipa ativo iha desenvolvimento Timor-Leste. GMN

 

Add to Comments Here!!!!

error: Content is protected.
Secured By miniOrange
You might also like:
CNRT sei hatama petisaun foun ba TR uza artigu 150 KRDT

Advogadu privadu Partidu CNRT, Manuel Tilman,...

Selebra 13 de Maiu, Dioceze Díli lori estatua Nossa Senhora do Rosario de Fatima la’o haleu kapital Díli

Selebrasaun Loron Nossa Senhora 13 Maiu,...

KM aprova ona kuadru kooperasaun ba dezenvolvimentu sustentavel

Konsellu Ministru (KM) Kuarta (13/5/2020), aprova...

Close