PR dekreta EE ba loron 30, Husu Governu kontrola pontu entrada

Prezidente Repúblika (PR), Francisco Guteres Lú Olo, Kinta (28/05/2020), offisialmente dekreta estensaun Estadu Emerjénsia (EE), ba faze daruak, no husu Governu mantein kontrolu máximu ba pontu entrada sira.

Relasiona ho Coronavírus, ne’ebé kontinua sai pandemia ba nasaun barak iha mundu hodi fó ameasa ba ema nia vida, inklui mós Timor-Leste, tanba ne’e Prezidente Repúblika haruka pedidu ba Parlamentu Nasionál, hodi husu autorizasaun ba estensaun Estadu Emerjénsia ba loron tolu nulu tan.

“Hafoin hatuir prosedimentu legál hotu ho kbi’it ne’ebé konstituisaun RDTL fó ba prezidente repúblika, ha’u dekreta horseik, atu renova Estadu Emerjénsia hahú ohin 28 Maiu 2020 oras 00:00 Otl, no sei remata, minutu ida, molok meia noite iha loron 26 Juñu 2020, la’os ho laran kman mak ha’u renova Estadu Emerjénsia dala ida tan, maibé ita presiza duni foti medida sira ne’e atu evita moras COVID-19 tama dala ida tan no makas liu tan, iha Timor-Leste, to’o pontu ne’ebé bele lakon kontrola no lakon ita nia rikusoi,deklarasaun renova Estadu Emerjénsia daruak nia objetivu bo’ot liu mak hasees risku hetan moras foun ne’e ka hetan coronavírus ne’ebé identifika ona nu’udar kauza ba moras COVID-19”, dehan, Xefe Estadu Francisco Guteres Lú Olo,” iha Palasiu Prezidensial Nicolau Lobato, Bairro-Pite, Kinta(28/05).

Prezidente Repúblika rekoñese maske ho Estadu Emerjénsia, durante fulan rua liu ba fó impaktu ba atividade ekonomia iha rai laran, tanba surtu COVID-19 inklui Estadu Emerjénsia komunidade hotu tenke hela iha uma, hodi prevene-an husi pandemia ne’e.

Aman ba nasaun ne’e hateten, maske apoiu ne’ebé mak Governu promete, atu fó subsídiu ba populasaun sira iha teritoriu Timor-Leste, inklui empreza privadu sira, maibé to’o ohin loron seida’uk bele realiza, tanba dadaun ne’e Governu sei aserta hela dadus.

Durante iha situasaun Estadu Emerjénsia (EE), Prezidente Repúblika (PR), Francisco Guterres Lú Olo, husu Governu mantein kontrolu máximu ba pontu entrada sira.

Atu kombate surtu COVID-19, labele da’et mai Timor-Leste, Prezidente Repúblika husu Governu atu halo kontrolu máximu, ba odamatan nasaun ni’an hanesan, portu, aeroportu no fronteira, nune’e evita ema tama mai ho ilegalmente.

“Ha’u husu ba Governu atu tau matan ba pontu entrada hotu-hotu, la’os de’it iha fronteira rai, portu no aeroportu maibé iha mós fatin sira seluk, iha tasi ninin, risku COVID-19 ka Coronavírus tama mai iha Timor-Leste bele mai mós ho Ró ki’ik ka Beró ne’ebé tama iha Atauru, Oe-cuse, Dili no Munisípiu sira seluk ne’ebé iha tasi”, dehan, Xefe Estadu Francisco Guterres Lú Olo, iha Palasiu Prezidente Nicolau Lobato, Bairro-Pite, Kinta (28/05).

Ho nune’e, Aman ba nasaun ne’e, hateten populasaun hotu presiza fó liman ba malu, atu Timor-Leste bele hakat liu, surtu COVID-19, ne’ebé mak sai inimigu ba ema hotu.

Enkuantu, Xefe Estadu mós agradese ba apoiu ne’ebé mak nasaun belun sira fó ba Timor-Leste iha ambitu COVID-19, inklui organizasaun internasionál ne’ebé fó solidariedade  hodi hasa’e kbi’it ba Estadu Timor-Leste.Ina

Leave a Reply

Your email address will not be published. Required fields are marked *