Xanana kontinua tulun família kbiit laek sira

Lider karismátiku, Kay Rala Xanana Gusmão, kontinua hala’o asaun karidade hodi fahe ai-han ba povu sira iha Aldeia Bedois, Suku Kamea, Postu Administrativu Kristu Rei, Munisípiu Díli, inklui ajuda rehabilita mos gruta iha fatin refere.

Administradór Kristu Rei, Gaspar da Silva,  hatete, Estadu Emerjénsia povu labele sai, tanba ne’e hanesan autoridade lokál buka koordena ho líder sira hodi identifika povu kbiit laek maka merese atu hetan apoiu.

“Ita nia avo Xanana maske nia katuas, maibe nia la sente kole, nia hadomi ita hotu. Kuaze fatin-fatin, foho leten, ai-laran, nia to’o hotu”,dehan Gaspar da Silva ba GMN, Segunda (1/6/2020), iha Bedois, Díli.

Líder nasionál apela ba komunidade tenki tuir regras nebe governu fó sai durante estabelese Estadu Emerjénsia.

“Ita agora iha situasaun ida neé tur hakmatek nafatin, rona tuir nafatin Xefe sira, halo tuir nafatin baihira sai karik. Ita (Moras COVID-19 ne’e) laiha, mas diak liu ita prevene doque ita hetan mai ita kait arbiru”,dehan komandante em Xefe FALINTIL, Kay Rala Xanana Gusmão ba populasaun sira iha Suku Kamea.

Komunidade sira iha fatin ne’e sente kontente no fó agradesimentu bo’’ot ba Kay Rala Xanana Gusmão, ne’ebé ho laran luak tebes bele fo ajuda ba sira hanesan aihan no seluk tan.

“Aman laran luak (Xanana) fó duni ajuda ba ami, ami kontente”,dehan komunidade Antónia Da Costa Freitas.

Iha oportunidade ne’e, eis Prezidente Repúblika Xanana Gusmão, fó apoiu material ba konstrusaun gruta bedois hanesan simenti saka limanulu, raihenek karada isin lima.

Xanana mos vizita monumentu 24 Fevereiru 1999 iha Bedois neébé juventude nain rua lakon vida hanesan Francisco Henrique no Joaquim De Jesus ne’ebé mate, tanba hetan tiru husi forsa indonézia.Nes