Fó servisu ba joven 60.000 la realiza, Sosiedade sivíl konsidera VIII Governu inkapasidade

Kampu traballu 60.000 ba joven sira hela de’it iha mehi, ho nune’e sosiedade sivíl konsidera VIII  Governu Konstituisionál inkapasidade.

Relasiona ho deklarasun Xefe Governu, Taur Matan Ruak, iha loron Sesta (03/07/2020), kona-ba kampu traballu rihun nen nulu ba joven sira, hela de’it iha mehi, nune’e, sosiedade sivíl konsidera Governu sai ezemplu la di’ak ba nia povu iha nia nasaun rasik no konsidera VIII Governu la sériu no laiha kapasidade hodi realiza nia promesa.

“Ne’e ladun sai ezemplu di’ak ba ita-nia rai no ba ita nia sosiedade, tanba sosiedade no ita-nia povu bele lakon fiar ba ita nia polítiku sira, bainhira koalia baratu, maibé la realiza hanoin katak promesa ida ne’e Governu uluk kuandu partidu sira halo kampañia ami dezafia kedas sira nia analisa ho rekursu ho limitasaun ne’ebé Timor-Leste iha, sira haree husi aspestu saida mak bele hamosu kampu traballu rihun 60 por ano, maibé sira dehan ne’e bele, mais ikus mai ne’e labele, entaun ne’e hatudu katak kampañia ne’e para atu buka votu de’it, mais la respeita saida mak sira halo komprimisu”, deklara Diretór ezekutivu FONGTIL, Daniel Santos dos Carmo, ba GMN iha ninia edifísiu Caicoli, Kinta (16/07/2020).

Daniel Santos haktuir, ho deklarasaun ne’e susar atu redus númeru dezempregu iha Timor-Leste, tanba Governu rasik hasa’i deklarasaun ne’ebé la serteza ba nia povu.

Ho deklarasaun, Xefe Governu ni’an ne’e, sosiedade sivíl konsidera, Governu laiha kapasidade no la sériu atu dezenvolve programa ne’ebé kreativu hodi hamosu kampu traballu ba  joven sira no susar atu halo dezenvolvimentu ba programa sira ne’ebé sira promete ona. Ina