FONGTIL fó formasaun planu estratéjiku ba membru ONG 25

Forum Organizasaun Naun Govermental Timor-Leste (FONGTIL) fó formasaun planu estratéjiku ba membru Organizasaun Naun Govermental (ONG) hamutuk 25 husi rejiaun leste, ho objetivu atu hasa’e koñesimentu oinsa membru ONG sira halo dezeñu planu estratéjiku ne’ebé di’ak liu.

“Formasaun ne’e atu ajuda membru ONG sira, oinsa atu define prioridade servisu ida, hodi kontribui ba objetivu jeral Estadu Timor-Leste nian. Objetivu hosi treinamentu ne’e mós hanoin katak, institusionál building ne’e presiza”, dehan Diretór Ezekutivu FONGTIL, Daniel Santos do Carmo, ba Jornalista sira, Kuarta (15/07/2020), iha Kaikoli, Díli.

Nia dehan, FONGTIL nia papel ida mak hasa’e kapasidade membru ONG sira, ne’ebé kada tinan formasaun la’o nafatin hodi hasa’e kapasidade membru ONG sira, atu bele hala’o papel hanesan parseiru krítiku Estadu iha prosesu konstrusaun Estadu.

Daniel afirma, tuir divisaun teritorial iha rejiaun hanesan, Oeste Sentral Leste no RAEOA, nune’e formasaun ne’e foka liu ba ONG sira iha parte leste ho total membru hamutuk 25, mai husi Munisipiu Manatuto, Baucau, Viqueque no Lautém, ho durasaun formasaun durante loron hitu (7).

“Depois de formasaun membru sira sei aplika objetivu estratejiku, hodi materealiza iha sira nia organizasaun, objetivu estratejiku sai ba programa no atividade. ONG sei halo akompañamentu hodi garante objetivu, ne’ebé sira deside durante formasaun bele aplika iha terenu relasiona ho kontextu lokal, problema sosial iha área ne’ebé sira servisu”, dehan Diretór Ezekutivu FONGTIL ne’e.

Husi sorin seluk, Koordenadór Gabinete Apoiu Sosiedade Sivil, Filipe da Costa, hateten, Gabinete Apoiu Sosiedade Sivil servisu hamutuk ho FONGTIL liu husi proposta ne’ebé FONGTIL hato’o iha tinan 2019, ho kontiudu proposta formasaun atu ema ba halo auditoria sosial, formasaun ba sosiedade sivil, inklui asesmentu sosiedade sivil iha Timor-Leste tomak.

“Apoiu hosi Gabinete fó ba FONGTIL ho montante orsamentu kuaze USD 400 e tall mill, ne’ebé nia distribuisaun fahe ba formasaun sira bazea ba proposta husi  FONGTIL. Formasaun sira ne’e importante tebes, tanba atu treinu membru sira prepara planu estratejiku ne’ebé diak”, tenik nia.

Filipe afirma, planu estratejiku dokumentu ida ne’ebé muda bei-beik tuir nesesidade. Antes ne’e ita foku barak liu iha área justisa, demokrasia, direitu umanu, paz no estabilidade, entretantu sosiedade sivil nia kontribuisaun iha área ne’e susesu tebes.

“Agora ba oin dezafiu ne’ebé sei iha mak oinsa bein-star ema nian, kresimentu eskonómia, edukasaun no saúde ne’ebé iha kualidade, entaun sosiedade sivil presiza hetan formasaun di’ak, nune’e bele halo parseriu di’ak ho Governu iha área sira”. Fel

Leave a Reply

Your email address will not be published. Required fields are marked *