Bispu Basílio: Joven Baucau-Oan tenke kria paz

Bispu Dioseze Baucau, Dom Basílio do Nascimento Pr, husu ba joven sira atu moris tuir uma kreda, kria paz no dame, hodi kontribui ba dezenvolvimentu.

Amu Bispu Dioseze Baucau, Dom Basílio do Nascimento, hateten, ho akontesimentu hirak ne’ebé akontese iha munisípiu Baucau, iha fulan Agustu ne’e, populasaun iha munisípiu refere, tenke la’o tuir dalan Maromak ni’an.

Tanba re-inaugurasaun ba uma kreda foun ne’ebé mak hafoun hikas ne’e, hanesan sinál ida ba ema hotu nu’udar sarani Katólika.

“Ita fila-fali ba buat ne’ebé ohin ha’u hateten iha omilia ne’e katak Uma Kreda foun ne’e sai hanesan mós sinál ida hanesan mós dezafiu ida ba ita ida-idak katak, atu hadi’a mundu, atu hadi’a sosiedade, atu hadi’a Timor, responsabilidade ita ida-idak ni’an, tribunal bela hateten buat lubuk ida bele tesi lia, polísia bele halo buat oi-oin, kadeia bele nakonu, mais ita ema lakohi simu, lakohi muda, la muda”, apelu Dom Basílio do Nascimento Pr, hafoin halo selebrasaun ba aniversariu Santo António ba dala 825 no re-inaugurasaun Katedral Santo Antonio, Baucau, Sabadu (15/08/2020).

Amu Bispu Baucau ne’e, haklaken, ho Uma Lulik ne’ebé mak hafoun hikas, nune’e labele uma de’it mak foun, maibé ema hotu presiza hadia-an no hafoun-an tuir Uma Kreda no Kristu nia hanorin, atu nune’e hotu-hotu bele moris ida domin no dame nia-laran.

Entretantu Dom Basílio, sublina mos katak, Uma Lulik ou Uma Kreda ne’e hanesan símbolu, nune’e Uma Kreda refere konvida ema hotu atu la’o tuir dalan Jesus Kristu ni’an. Ina