Dom Virgílio: Igreja Katólika rejeita halo manisfestasaun iha TL

Arcebispo Arquidiocese Metropolita Díli, Dom Virgílio do Carmo da Silva SDB, rejeita informasaun ne’ebé fó sai husi autoridade seguransa sira katak igreja sei kolabora ho grupu balun atu halo manifestasaun iha Timor-Leste (TL).

Dom Virgílio hatete to’o oras ne’e Igreja seidauk iha hanoin ruma atu halo manifestasaun hasoru Estadu no Governu.

“Informasaun ne’ebé oras ne’e espalla iha públiku katak Uma Kreda atu halo manifestasaun ida. Kona-bá manifestasaun ne’e rasik husi parte Igreja deklara katak la iha hanoin no hakarak atu halo manifestasaun ruma hanesan oras ne’e espalla iha Públiku. Wainhira informasaun ne’e to’o autoridade Seguransa no Sivíl nia tilun karik, husu ho favor atu verifika lai ho autoridade Uma Kreda ni’an molok fó sai ba públiku”, hateten Arcebispo Arquidiocese Metropolita Díli, Dom Virgílio do Carmo da Silva SDB, liu husi konferénsia ba imprensa ne’ebé hala’o iha rezindénsia Episkopál Lecidere-Díli, Kinta (27-08-2020).

Dom Virgílio salienta Konferénsia Episkopál Timor-Leste mak hanesan autoridade máximu Igreja ni’an iha Timor-Leste. Tamba ne’e, bainhira iha Amu Lulik ruma ka sarani balun mak ho hanoin pesoál atu halo manifestasaun ida ne’e la reprezenta Igreja Katólika.

“Ohin rona kona-bá ema lubuk no sarani lubuk ida ne’ebé notísia ne’ebé espalla hela iha sosiedade nia leet liu husi média, depois de consulta ho Prezidente Episkopál Timor-Leste aproveita oportunidade atu fo sai ba públiku kona-bá pozisaun Uma Kreda ni’an iha momentu ida ne’e”, deklara Arcebispo ne’e. Oct